ەلىمىزدە اسكەري قىزمەتكەرلەر مەن ولاردىڭ وتباسى مۇشەلەرى جىلىنا ءبىر رەت ەل اۋماعىندا جولاۋشىلار پويىزدارىمەن تەگىن قاتىناي الادى، دەپ حابارلايدى «ادىرنا» ءتىلشىسى.
ىشكى ىستەر مينيسترلىگىنىڭ مالىمەتىنشە، باستاما اسكەري قىزمەتكەرلەردىڭ الەۋمەتتىك جاعدايىن جاقسارتۋعا جانە ولاردىڭ وتباسىمەن بىرگە ساپارلاۋ مۇمكىندىگىن ارتتىرۋعا باعىتتالعان.
«جولاۋشىلار تاسىمالى» اق تاسىمالداۋ ەكونوميكاسى جانە ەسەبى دەپارتامەنتىنىڭ باس مەنەدجەرى اينۇر بازارباەۆا تەگىن جول ءجۇرۋ قۇقىعى تەك قازاقستان ىشىندەگى باعىتتاردا قاتىنايتىن جولاۋشىلار پويىزدارىنا قولدانىلاتىنىن اتاپ ءوتتى. سونداي-اق اتالعان شىعىندار "قازاقستان تەمىر جولى" ۇلتتىق كومپانياسىنىڭ قاراجاتى ەسەبىنەن وتەلەتىنىن ءتۇسىندىردى.
ءىم ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى قايرات ۇمبەتوۆ جوبانى ىسكە اسىرۋ بارىسىندا بەلگىلەنگەن تالاپتاردىڭ قاتاڭ ساقتالۋى قاجەتتىگىن ايتتى. سونداي-اق اتالمىش الەۋمەتتىك قولداۋدىڭ اسكەري قىزمەتشىلەر مەن ولاردىڭ وتباسى مۇشەلەرىنىڭ الەۋمەتتىك قورعالۋ دەڭگەيىن ارتتىرۋعا، دەمالىستى الدىن الا جوسپارلاۋعا جانە جول شىعىندارىن ەداۋىر ازايتۋعا مۇمكىندىك بەرەتىنىن جەتكىزدى.
