سەيسەنبىدە حابارلانعانداي, قازاقستاندا مەكتەپ وقۋشىلارى مۋزەيلەرگە تەگىن كىرە الادى. ال 2020 جىلى وقۋشىلاردىڭ مۋزەيگە اقىلى ەمەس، تەگىن كىرۋى ءۇشىن ەتنوگراف-عالىم تاتتىگۇل قارتاەۆا ماسەلە كوتەرگەن بولاتىن. اتالعان ماسەلە وڭ ناتيجەگە شەشىلىپ، مەكتەپ شاكىرتتەرى بىرقاتار مۇراجايلارعا تەگىن كىرە الاتىن بولدى، دەپ حابارلايدى “ادىرنا” ۇلتتىق پورتالى.
بۇل تۋرالى ەتنوگراف-عالىم ءوز Facebook پاراقشاسىندا حابارلادى.
“9 يۋن 2020 جىلى فب پاراقشامدا: "قازاقستاندا مەكتەپ وقۋشىلارى ءۇشىن بارلىق مۋزەيگە كىرۋ تەگىن بولۋى كەرەك دەپ سانايمىن! وسكەلەڭ ۇرپاق مۋزەيلەردە ساقتالىپ تۇرعان ءوز اتا-بابالارىنىڭ اسىل مۇراسىن، تاريحي جولدارىن، ەلىمىزدىڭ تاريحي-مادەني قۇندىلىقتارىن نەگە قاراجات تولەپ كورۋى قاجەت", - دەپ جازعان ەدىم. الايدا مادەنيەت مينيسترلىگى تەك جازعى كانيكۋل ايلارىندا عانا وقۋشىلارعا مۋزەيگە كىرۋگە تەگىن مۇمكىندىك بەردى. وقۋ جىلىندا اقشا تولەپ كىرگەن بالا، تەگىن ەكەن دەپ كۇندە كانيكۋلدا مۋزەيگە كەلمەيدى. وقۋشىلاردىڭ مۋزەيگە كىرۋىن تەگىن ەتۋ كەرەك دەگەن ماسەلەنى كوتەرگەنىمىزدە وسى سالاداعى قۇزىرلى ورىنداردىڭ قارسىلىعىن دا كورگەن ەك. "الماتى مۋزەيلەر بىرلەستىگىنە" قارايتىن 9 مۋزەيگە جىل بويىنا مەكتەپ وقۋشىلارىنا كىرۋ تەگىن بولاتىندىعى جونىندە شەشىم قابىلداندى”، - دەپ جازدى ول ءوز جازباسىندا.
سونداي-اق ول كەلەشەك ۇرپاقتى پاتريوت ەتىپ تاربيەلەۋ ءۇشىن مۋزەيلەرگە اقى قويماي، وقۋشىلاردىڭ مۇراجاي ەسكەرتكىشتەرىن تەگىن كورۋىنە جاعداي جاسالۋى كەرەكتىگىن اشىپ ءتۇسىندىردى.
“الماتىنىڭ وسى اقجولتاي شەشىمىن مادەنيەت مينيسترلىگى ەش نامىستانباي قابىل الىپ، قازاقستاننىڭ بارلىق مۋزەيلەرىنە وقۋشىلاردىڭ كىرۋىن تەگىن ەتۋ كەرەك! مەملەكەت قارجىسىن وقۋشىلار ەسەبىنەن تولتىرۋدى توقتاتايىق. ۇلتتىق برەندتەرىمىز مۋزەيدە! پاتريوت ۇرپاق تاربيەلەيمىز دەيمىز، مەملەكەت قاراجاتىنا جاسالعان مۋزەيدى وقۋشىعا اقىعا كورسەتۋىمىز اقىلعا سىيا ما؟
P.S. الماتى اكىمدىگى ەندى "كۇنتىزبە ەسكەرتكىشتەردى" تۇزەسە، اشىق اسپان استى مۋزەي-ەسكەرتكىشتەرىنە قاتىستى وڭ شەشىم جاسار ەدى”، – دەپ تولىقتىردى تاتتىگۇل قارتاەۆا.
“ادىرنا” ۇلتتىق پورتالى
