الماتى قالاسىنداعى قارۋلى كۇشتەردىڭ رايىمبەك باتىر اتىنداعى دەسانتتىق-شابۋىلداۋ بريگاداسى روتاسىنىڭ ستارشيناسى 3-سىنىپتى سەرجانت سەيىتجان اسىلبەكوۆتىڭ وتباسىندا ۇشەم دۇنيەگە كەلدى. بۇل تۋرالى قورعانىس مينيسترلىگى.جاريالادى، دەپ حابارلايدى ”ادىرنا” ۇلتتىق پورتالى
ناۋرىز مەيرامى قارساڭىندا الماتى قالاسىنىڭ پەريناتالدىق ورتالىعىنان ول زايىبى مەن ۇشەمىن، ياعني ەكى ۇل مەن ءبىر قىزىن شىعاردى.
سەيىتجان مەن مينيرا اسىلبەكوۆتاردىڭ وتباسىندا ون ءبىر جاسار قىزى ديانا ءوسىپ كەلەدى. ۇزاق ۋاقىت بويى اتا-انالار ەكىنشى بالانىڭ بولۋىن ارمانداعان. ەندى مينارا ۇشەمدى دۇنيەگە اكەلدى. جۇبايلار ۇلدارعا سۇڭقار مەن زاڭعار، ال قىزدارىنا سىرعالىم دەگەن ات قويدى.
“ايەلىم ۇشەمگە اياعى اۋىر ەكەنىن بىلگەندە قاتتى تاڭ قالدىم. مەنىڭ دە، ونىڭ دا تۇقىمدارىندا ەگىزدەر بار. بىراق ەشكىمدە ۇشەم جوق ەكەن. مەن باقىتتىمىن. ىشىمنەن ۇل بولسا ەكەن دەپ تىلەدىم. ويىمداعىم قابىل بولىپ، بىردەن ەكى ۇل، ءبىر قىز ومىرگە كەلدى. ەندى وسىنداي وتباسىمنىڭ الدىندا ۇلكەن جاۋاپكەرشىلىك تۇرعانىن دا سەزەمىن”، – دەپ قۋانىشىن ايتتى 3-سىنىپتى سەرجانت سەيىتجان اسىلبەكوۆ.
ۇشەمنىڭ دۇنيەگە كەلۋى وتباسىنىڭ ءومىرىن تۇبەگەيلى وزگەرتكەندەي. ەندى اسىلبەكوۆتار جاتاقحاناداعى بولمەدەن كەڭ پاتەرگە كوشەدى. ال سابيلەردى قاراۋعا اجەلەرى مەن اسكەري قىزمەتشىلەردىڭ وتباسى مۇشەلەرىمەن جۇمىس قىزمەتى كومەكتەسەدى.
