ەلىمىزدە جەكە مەكتەپتەرگە قويىلاتىن تالاپتار وزگەرەدى. بۇل تۋرالى الماتى قالاسىنداعى جەكە مەكتەپتەردىڭ قۇرىلتايشىلارى مەن ديرەكتورلارىنىڭ قاتىسۋىمەن وتكەن كەزدەسۋدە وقۋ-اعارتۋ ءمينيسترى جۇلدىز سۇلەيمەنوۆا مالىمدەدى، دەپ حابارلايدى "ادىرنا".
مينيسترلىك مالىمەتىنشە، بۇدان بىلاي ەلىمىزدە جەكە مەكتەپتەر تەك ناقتى قاجەتتىلىك تۋىنداپ وتىرعان وڭىرلەردە عانا اشىلادى. ليتسەنزيا تەك ءۇشاۋىسىمدى مەكتەپتەردى، اپاتتى جاعدايدا تۇرعان ءبىلىم وردالارىن الماستىرۋ ماقساتىندا مەملەكەتتىك مەكتەپتەر جەتىسپەيتىن وڭىرلەرگە عانا بەرىلەدى.
«سونىمەن قاتار، جەكە مەكتەپتەر قۇرىلتايشىلارىنىڭ جاۋاپكەرشىلىگى دە زاڭ اياسىندا جەتىلدىرىلەدى. ولار مەكتەپتەردەگى ءبىلىم ساپاسى، ۇستازداردىڭ بىلىكتىلىگى جانە وقۋشىلاردىڭ قاۋىپسىزدىگىن قامتاماسىز ەتۋگە جاۋاپكەرشىلىك الادى. قازىرگى تاڭدا قۇرىلتايشىلاردىڭ عانا ەمەس، مەكتەپ ديرەكتورلارىن تاعايىنداۋ ءتارتىبىن دە وزگەرتۋ جوسپارلانىپ وتىر. ەندى مەكتەپ ديرەكتورلارىن بۇرىنعىداي قۇرىلتايشىلار تاڭدامايدى. شەشىم قابىلداۋ كەزىندە سالالىق مينيسترلىك پەن جەرگىلىكتى اتقارۋشى ورگانداردىڭ كەلىسىمى ەسكەرىلەدى»، – دەلىنگەن حابارلامادا.
قازىر ەلىمىزدەگى 785 جەكە مەكتەپتىڭ قۇجاتتارى تسيفرلاندىرىلعان. جالپى ليتسەنزياسى بار 890 جەكە مەكتەپ بار. ۇكىمەت جاڭادان اشىلاتىن جەكە مەكتەپتەرگە مەملەكەتتىك تاپسىرىس ورنالاستىرۋ ىسىنە موراتوري جاريالاۋدى جوسپارلاپ وتىر.
ايتا كەتسەك، 2025 جىلى جەكەمەنشىك مەكتەپتەرگە بيۋدجەتتەن شامامەن 74 ملرد تەڭگە بولىنگەن. قارجى مينيسترلىگى بۇل قاراجات، ەڭ الدىمەن، وقۋ جىلىنىڭ باسىندا جينالىپ قالعان قارىزدى تولىق وتەۋگە جۇمسالعانىن حابارلاعان.
