بەلگىلى ۇستاز، قوعام بەلسەندىسى ءومىر شىنىبەكۇلى اسحات ايماعامبەتوۆتىڭ قىزمەتتەن بوساتىلۋىنا قاتىستى پىكىر ءبىلدىرىپ، جاڭادان تاعايىندالعان وقۋ-اعارتۋ مينيسترىنە ساتتىلىك تىلەدى، دەپ جازادى "ادىرنا" ۇلتتىق پورتالى.
"مينيستر كەتتى.... جاڭا مينيسترگە ساتتىلىك... فرانتسۋزداردا پاتشا ولسە ىرعالىپ-جىرعالماي "كورول ءولدى، جاساسىن كورول" دەپ كەلەسى پاتشانى تاققا وتىرعىزاتىن ءداستۇر بار.. بىزدە دە "دۇرىس-بۇرىس" دەپ ىرعالىپ-جىرعالۋعا ۋاقىت تاپشى... دەگەنمەن، كەتكەن مينيستر تۋرالى بىرەر ءسوز اۋىز ءسوز ايتايىن.. مەنىڭشە، اسحات ايماعامبەتوۆ قىرۋار شارۋا اتقاردى. وزگە شارۋالارىن سانامالاپ جاتپاي-اق قويايىق.. اسەكەڭنىڭ جاساعاندارىنىڭ ىشىندەگى ەڭ سۇبەلىسى - اشىقتىعى بولدى. "يا ناچالنيك، تى دۋراك" دەگەن بولشەۆيكتىك ۇستانىمنان اجىراي قويماعان قوعامدا ءمينيستردىڭ قاتارداعى مۇعالىمدەرمەن ەتەنە جۇمىس جاساۋى، ءبىزدىڭ قوعامدى دەموكراتيالاندىرۋعا قوسىلعان ۇلكەن ۇلەس دەپ ايتار ەدىم.. وزگە مينيسترلەر مەن اكىمدەر، اسىرەسە يدەولوگتار بۇل جونىنەن اسحات قاناتۇلىنان ۇلگى السا بولادى...", - دەيدى ءومىر شىنىبەكۇلى.
بىلىكتى پەداگوگ ءبىلىم سالاسىندا ءالى دە بولسىن شەشىمىن تاپپاي كەلە جاتقان ماسەلەلەرگە توقتالدى.
"ال كەيبىر ماسەلەلەردى شەشە الماسا وعان ءبىزدىڭ زاڭداردىڭ سولقىلداقتىعى (باسقارما باسشىسىن اكىمنىڭ تاعايىنداۋى) كەدەرگى بولدى دەپ ويلايمىن. ايماعامبەتوۆتىڭ جاساي الماي كەتكەن تاعى ءىسى - مينيسترلىك پەن ونىڭ اينالاسىن بىلىكسىز كادرلاردان تازارتا الماۋى دەر ەدىم. بىراق بۇل جاعدايدا دا اسحات قاناتۇلىن تۇسىنۋگە بولادى. مينيسترلىكتە جۇمىس ىستەيتىن كەيبىر مامانداردىڭ "كوكەلەرى" ايماعامبەتوۆتەن بيىكتە وتىرۋى مۇمكىن.. ءوز باسىم 3,5 جىلداي ەڭ شۋلى دا، داۋلى سالانى باسقارىپ ۇلكەن مەكتەپتەن وتكەن ءدال قازىرگى ا.ايماعامبەتوۆ ءۇشىن ءمينيستردىڭ شەكپەنى تار دەپ ويلايمىن! پرەزيدەنت ق.توقاەۆ ايماعامبەتوۆ سەكىلدى پوتەنتسيالى زور كادردى ورنىمەن پايدالاناتىن شىعار دەپ ۇمىتتەنەمىن!", - دەيدى تاريحشى.
ءومىر شىنىبەكۇلى جاڭادان تاعايىندالعان وقۋ-اعارتۋ ءمينيسترى جايلى دا ءسوز قوزعادى.
"ال جاڭا ءمينيسترىمىز عاني بەيسەمباەۆ ءبىلىم سالاسىنىڭ بارلىق باسپالداعىنان وتكەن وتە تاجىريبەلى مامان. ادام رەتىندە كىسىنى بوتەنسىنۋدى بىلمەيتىن جايدارى دا، اشىق مىنەزدى ەكەنىن بىلەمىن! سوندىقتان، اسحات قاناتۇلى باستاعان اشىقتىق ءداستۇرىن عانەكەڭ جالعاستىرادى دەپ ۇمىتتەنەمىن! ەكى ازاماتىمىزدىڭ دا جۇمىستارىنا ساتتىلىك تىلەيمىن! بىراق، عانەكەڭ ءوز جۇمىسىن وزىنە قاراستى بارلىق مەملەكەتتىك ءبىلىم بەرۋ مەكەمەلەرىن تولىق ينۆەنتاريزاتسيا مەن اۋديت وتكىزۋدەن باستاماسا ءبارى بەكەر بولاتىنىنا مەن كامىل سەنەمىن!", - دەپ جازدى ءومىر شىنىبەكۇلى.
"ادىرنا" ۇلتتىق پورتالى
