مەملەكەت باسشىسى قاسىم-جومارت توقاەۆتىڭ 2025 جىلى جامبىل وبلىسىنا جاساعان جۇمىس ساپارى كيەلى ءوڭىردىڭ تاريحىنداعى تاعىلىمى تەرەڭ، ەل جادىندا ۇزاق ساقتالاتىن ايتۋلى وقيعالارمەن ەرەكشەلەنگەنىن جاقسى بىلەمىز. بۇل تەك الەۋمەتتىك-ەكونوميكالىق ماسەلەلەردى قامتىعان رەسمي ءىسساپار عانا ەمەس، سونىمەن قاتار ۇلتتىق رۋحتى كوتەرگەن، تاريحي ادىلەتتىلىكتى قالپىنا كەلتىرگەن تاعىلىمى تەرەڭ ايتۋلى وقيعا رەتىندە جوعارى باعالاندى.
ساپار اياسىندا قازاق حالقىنىڭ ءبىرتۋار پەرزەنتى، ۇلى وتان سوعىسىنىڭ اڭىزعا اينالعان قاھارمانى، اسكەري قولباسشى، جازۋشى باۋىرجان مومىشۇلىنا «حالىق قاھارمانى» اتاعىنىڭ بەرىلۋى – وسىنىڭ ايقىن دالەلى.
بۇل شەشىمنىڭ حاس باتىردىڭ كىندىك قانى تامعان تۋعان جەرى توپىراعى قاسيەتتى جۋالى اۋدانىنىڭ جۇرتشىلىعى ءۇشىن دە ءمانى زور، ماعىناسى ەرەك. ونىڭ تاعىلىمدى تاعدىرى مەن ونەگەلى ءومىر جولى جۇلدىزى بيىك جۋالى اۋدانىنىڭ قوعامدىق ومىرىمەن، وسىناۋ كيەلى ءوڭىردىڭ تاعىلىمدى تاريحىمەن، تۇتاستاي العاندا، ۇلتتىڭ رۋحاني بولمىسىمەن بىتە قايناسقان دەسەك، ارتىق ايتقاندىق ەمەس.
باۋىرجان مومىشۇلىنىڭ ەرلىگى مەن تۇلعالىق دارا بولمىسى – سوناۋ سوعىس جىلدارىنان بەرى حالىقتىڭ جادىندا. ول مايدان دالاسىندا تەڭدەسسىز باتىرلىعىمەن تانىلىپ قانا قويماي، سوعىستان كەيىنگى بەيبىت ومىردە دە ۇلت رۋحانياتىنا ولشەۋسىز ۇلەس قوستى. ونىڭ اسكەري-پاتريوتتىق ەڭبەكتەرى، ادامگەرشىلىك پەن وتانسۇيگىشتىككە ۇندەيتىن وي-تولعامدارى بىرنەشە بۋىننىڭ ءتالىم-تاربيەسىنە نەگىز بولدى. سوندىقتان داڭقتى قولباسشىعا «حالىق قاھارمانى» اتاعىنىڭ بەرىلۋى حالىق ۇزاق جىل كۇتىپ، ۋاقىت سىنىنان وتكەن تاريحي شەشىم رەتىندە قابىلداندى.
وسىناۋ قۋانىشتى وقيعاعا وراي جامبىل وبلىسىنىڭ زيالى قاۋىم وكىلدەرى – قوعام قايراتكەرلەرى، ارداگەرلەر، اقىن-جازۋشىلار، عالىمدار مەن مادەنيەت سالاسىنىڭ كورنەكتى وكىلدەرى مەملەكەت باسشىسىنا العىس حات جولداپ، وندا پرەزيدەنتتىڭ باۋىرجان مومىشۇلىنىڭ ەرلىگىن مەملەكەت دەڭگەيىندە جوعارى باعالاپ، تاريحي ادىلەتتى قالپىنا كەلتىرگەنى ءۇشىن شىنايى ريزاشىلىق بىلدىرىلگەنى دە ەرەكشە اتاپ ايتۋعا تۇرارلىق يگى ءىس.
العىس حاتتا باۋىرجان مومىشۇلىنا «حالىق قاھارمانى» جوعارى اتاعىن بەرۋگە شەشىم ەتۋ ارقىلى تاريحي ادىلەتتىلىكتى قالپىنا كەلتىرىلگەندىگى، بۇل تاريحي شەشىمنىڭ – ۇلتتىڭ ۇلى تۇلعالارىن ۇلىقتاۋدىڭ جارقىن كورىنىسى ەكەنىن اتاپ وتكەن. «حالىق قاھارمانى» جوعارى مارتەبەلى اتاعىنىڭ باۋىرجان مومىشۇلىنا بەرىلۋى – ۇل قاھارمانىمەن قاتار، وتتى جىلداردا وت كەشكەن بارلىق باتىرلاردىڭ رۋحىنا كورسەتىلگەن قۇرمەت ەكەندىگىن ەرەكشك اتاپ كورسەتتى.
سونىمەن بىرگە، العىس حاتتا باۋىرجان مومىشۇلى شايقاستاردا كورسەتكەن قاھارماندىعى، تەمىردەي ءتارتىبى مەن ستراتەگيالىق ويلاۋ قابىلەتى الەمدىك اسكەري تاريحتا ەرەكشە ورىن الاتىنى كورسەتىلدى.
العىس حاتتا باتىردىڭ مايدان دالاسىندا عانا ەمەس، بەيبىت ومىردە دە ەلگە قىزمەت ەتىپ، امانات ەتىپ قالدىرعان ادەبي باي مۇراسى مەن ادامگەرشىلىك، ءتارتىپ، وتانسۇيگىشتىك جونىندەگى تاعىلىمدى دا تەرەڭ ويلارى بۇگىنگى جاستار ءۇشىن دە، بولاشاق ۇرپاق ءۇشىن دە باعا جەتپەس قۇندى قازىنا بولىپ قالا بەرەتىنى ايتىلدى.
شىن مانىندە باۋىرجان مومىشۇلى – كۇللى الاش جۇرتىنىڭ ايبىنىنا اينالىپ، ەل باسىنا قيىن كۇن تۋعان قىستالاڭ شاقتا مايداننىڭ الدىڭعى شەبىنەن تابىلىپ، وتان ءۇشىن وت كەشكەن باتىر عانا ەمەس، ەلدىك پەن ەرلىكتىڭ، ءتارتىپ پەن تاباندىلىقتىڭ سيمۆولىنا اينالعان دارا تۇلعا. ونىڭ ماسكەۋ تۇبىندەگى قيان-كەسكى شايقاستارداعى اسقان ەرلىگى، قولباسشىلىق دارىنى مەن تەمىردەي ءتارتىبى الەمدىك اسكەري تاريحتا وشپەس ءىز قالدىرعانىن جاقسى بىلەمىز. باتىردىڭ ەرلىك ىستەرى – ءبىر كەزەڭنىڭ عانا ەمەس، كۇللى قازاق حالقىنىڭ نامىسى مەن اسقاق رۋحىن ايشىقتى بەينەلەيتىن اسىل مۇرا.
پرەزيدەنتتىڭ داڭقتى قولباسشى باۋىرجان مومىشۇلىنا «حالىق قاھارمانى» اتاعىن بەرۋ تۋرالى جارلىعىن – ۇلتتىق سانانى جاڭعىرتىپ، تاريحي ادىلدىكتى ورنىقتىرعان، ەلدىڭ بىرلىگىن بەكەمدەپ، ەگەمەندىكتىڭ ەڭسەسىن بيىكتەتكەن دۇرىس شەشىم رەتىندە جوعارى باعالانىمىز دۇرىس بولماق.
بۇل – ءوزىنىڭ تۋعان ەلىن شەكسىز ءسۇيىپ، كوزى تىرىسىندە وعان ادال قىزمەت ەتە بىلگەن ايتۋلى ەرلەردىڭ اسقاق رۋحىنا كورسەتىلگەن زور قۇرمەت، باتىر بابالاردىڭ اماناتىنا دەگەن ادالدىقتىڭ ايعاعى.
نۇرجان ماناسۇلى،
جۋالى اۋداندىق «جاڭا ءومىر» گازەتىنىڭ باس رەداكتورى
