جامبىل وبلىسىنداعى "مەركى ورمان جانە جانۋارلار دۇنيەسىن قورعاۋ مەكەمەسى" اۋماعىندا قۇرعاق ءشوپ ورتەندى. بۇل تۋرالى توتەنشە جاعدايلار دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، 2023 جىلعى 2 تامىزدا مەركى اۋدانى اقتوعان اۋىلىنان 20 كم جەردە تاۋلى اۋماقتا الدىن الا بولجاممەن 200 گا الاڭدا قۋراعان ءشوپ جانعان.
“قازاۆياورمانكۇزەتىنىڭ سۋ جيناۋ قۇرىلعىسى بار (1,5 توننا) ان-2 ۇشاعىمەن اەروۆيزۋالدى بارلاۋ جانە ءسوندىرۋ جۇمىستارى جۇرگىزىلدى. ءورت وشاقتارىنا اۋەدەن 11 رەت سۋ توگىلدى (شامامەن 16,5 توننا). قر تجم "قازاۆياقۇتقارۋ" اق ەو-145 تىكۇشاعىمەن اەروۆيزۋالدى بارلاۋ جۇرگىزىلۋدە”، – دەلىنگەن حابارلامادا.
ءورتتى ءسوندىرۋ ءۇشىن قازورماناۆيا كۇزەتىنىڭ، جەرگىلىكتى اتقارۋشى ورگانداردىڭ جانە جامبىل وبلىسى تجد كۇشتەرى مەن قۇرالدارىنان 161 ادام، 24 بىرلىك تەحنيكا، 2 ۇشاق جانە 1 تىكۇشاعى جۇمىلدىرىلعان.
