اقوردا پرەزيدەنت قاسىم-جومارت توقاەۆتىڭ جولداۋدا ايتقان ء«تارتىپ بۇزاتىن ايەلدەرگە» قاتىستى سوزىنە تۇسىنىكتەمە بەردى، دەپ حابارلايدى «ادىرنا» ءتىلشىسى.
حابارلامادا كەيبىر جانداردىڭ مەملەكەت باسشىسىنىڭ ءسوزىن ەسكەرتۋ رەتىندە قابىلداعانى ايتىلعان.
«پرەزيدەنتتىڭ قازاقستان حالقىنا جولداۋى تۇرعىن ءۇي-كوممۋنالدىق شارۋاشىلىقتان باستاپ، اۋىل شارۋاشىلىعى، تسيفرلاندىرۋ، سۋ سالاسى، ءبىلىم، سپورت جانە باسقا دا كوپتەگەن ماسەلەلەردى قامتىدى. ەرەكشە نازار «زاڭ جانە ءتارتىپ» قاعيداتىن ساقتاۋ – مەملەكەتتىڭ ىرگەتاسى رەتىندە قاراستىرۋعا اۋدارىلدى. جولداۋدا پرەزيدەنت ازاماتتاردى كەز كەلگەن قۇقىقبۇزۋشىلىققا «نولدىك توزىمدىلىك» تانىتۋعا شاقىردى. وسى ورايدا مەملەكەت باسشىسى: «وكىنىشكە قاراي، قوعامدىق ءتارتىپتى بۇزۋشىلاردىڭ اراسىندا ايەلدەر دە بار»، - دەپ اتاپ ءوتتى. كەيبىرەۋلەر مۇنى ەسكەرتۋ رەتىندە قابىلدادى، بىراق ءمانى مۇلدە باسقا. ەگەر ەجەلدەن سۇلۋلىقتىڭ، نازىكتىكتىڭ، ۇيلەسىمنىڭ سيمۆولى بولعان ايەلدەر جانجالدارعا ارالاسا باستاسا، دەمەك، مىنەز-قۇلىق مادەنيەتىنىڭ داعدارىسى شىنىمەن دە كۇردەلى سيپاتقا يە بولدى دەگەن ءسوز»، - دەلىنگەن حابارلامادا.
اقوردا بۇل مالىمدەمەنى جالپى قوعامعا ايتىلعان ۇندەۋ رەتىندە قابىلداۋ كەرەكتىگىن جەتكىزدى.
«بۇل سوگىس ەمەس، جىنىسىنا، جاسىنا نەمەسە شىققان تەگىنە قاراماستان، بارشامىزعا باعىتتالعان قۇرمەتتى قارىم-قاتىناس مادەنيەتىن قايتا ورالتۋعا شاقىرۋ. جولداردا، كەزەكتەردە، ۆوكزالداردا، ۇشاقتاردا جانە باسقا جەرلەردە جيىلەپ كەتكەن ءوزارا قۇرمەتسىزدىك جاعدايلارى ءبىزدىڭ مەنتاليتەتىمىزدىڭ ءبىر بولىگىنە اينالماۋى ءتيىس سوندىقتان ايتىلعان سوزدەردىڭ ءمانى – ەتيكا مەن قارىم-قاتىناس مادەنيەتىن قالىپتاستىرۋدا، ادەپتىلىك پەن ءوزارا قۇرمەتتى ارتتىرۋدا جاتىر. بۇل مىندەت ەشقاشان تەك ايەلدەردىڭ موينىنا جۇكتەلمەيدى. بۇل – بۇكىل قوعامنىڭ مىندەتى»،– دەلىنگەن حابارلامادا.
ەسكە سالايىق، بۇعان دەيىن پرەزيدەنت ءوز جولداۋىندا قوعامدىق ءتارتىپتى بۇزاتىن ايەلدەر دە بار ەكەنىن اتاپ وتكەن ەدى.
«اشىعىن ايتۋىمىز كەرەك، قازىر ادامداردا دورەكى سويلەپ، ءبىر-بىرىنە ەرەگىسىپ، جاعا جىرتىساتىن ادەت بار. وسىنداي كەلەڭسىز وقيعالاردى، اسىرەسە، قوعامدىق ورىنداردا، جول بويىندا ءجيى كورۋگە بولادى. وكىنىشكە قاراي، سولاردىڭ ىشىندە ايقاي-شۋ شىعاراتىن، بالاعات سوزدەر ايتىپ، قوعامدىق ءتارتىپتى بۇزاتىن ايەلدەر دە بار. بۇل – مادەنيەتتى، وركەنيەتتى قوعامعا جاراسپايتىن قىلىق، ەلىمىزدىڭ حالىقارالىق قوعامداستىقتاعى بەدەلىنە زيان كەلتىرەتىن قۇبىلىس»، دەگەن ەدى توقاەۆ.
