اقش پرەزيدەنتى دونالد ترامپ يرانمەن ساۋدا قاتىناسىن جۇرگىزەتىن بارلىق ەلدەرگە 25 پايىزدىق كەدەندىك باج سالىعىن ەنگىزەتىنىن مالىمدەدى، دەپ حابارلايدى "ادىرنا" ۇلتتىق پورتالى.
ترامپ اقپاراتتى Truth Social الەۋمەتتىك جەلىسىندە جازدى.
«وسى ساتتەن باستاپ يسلام رەسپۋبليكاسىمەن — يرانمەن — بيزنەس جۇرگىزەتىن كەز كەلگەن ەل اقش-پەن جاسالاتىن بارلىق كوممەرتسيالىق وپەراتسيالار ءۇشىن 25 پايىزدىق باج سالىعىن تولەيدى. بۇل شەشىم تۇپكىلىكتى جانە قايتا قاراۋعا جاتپايدى»، — دەپ جازدى اق ءۇي باسشىسى 12 قاڭتاردا.
دونالد ترامپتىڭ ايتۋىنشا، بۇل شارا يران ۇكىمەتىنە قىسىم كورسەتۋ ماقساتىندا قابىلدانعان. اق ءۇي باسشىسى بيلىكتىڭ ەل ىشىندەگى نارازىلىق اكتسيالارىن كۇشپەن باسىپ-جانشىپ وتىرعانىن اتاپ ءوتىپ، بۇعان دەيىن نارازىلىق بىلدىرۋشىلەرگە كومەكتەسەتىنىن مالىمدەگەن بولاتىن.
Bloomberg اگەنتتىگىنىڭ مالىمەتىنشە، يراننىڭ نەگىزگى ساۋدا سەرىكتەستەرى قاتارىندا ءۇندىستان، قىتاي جانە تۇركيا بار. اگەنتتىك اتاپ وتكەندەي، قىتاي ونىمدەرىنە قوسىمشا 25 پايىزدىق تاريف ەنگىزۋ دونالد ترامپتىڭ وتكەن جىلدىڭ سوڭىندا قحر توراعاسى سي تسزينپينمەن جاساعان ساۋدا ء«بىتىمىن» بۇزۋى مۇمكىن.
يراندا جاپپاي تولقۋلار جەلتوقسان ايىنىڭ سوڭىنان بەرى جالعاسىپ كەلەدى. نارازىلىقتار باستاپقىدا ريال باعامىنىڭ كۇرت قۇلدىراۋى مەن ەلدەگى ەكونوميكالىق جاعدايدىڭ ناشارلاۋىنان تۋىنداعان. كەيبىر قالالاردا ميتينگىلەر قۇقىق قورعاۋ ورگاندارىمەن قاقتىعىسقا ۇلاسىپ، قولدانىستاعى ساياسي جۇيەگە قارسى ۇراندارمەن قاتار جۇرگەن.
Iran Human Rights قۇقىق قورعاۋ ۇيىمىنىڭ دەرەگىنشە، 12 قاڭتار كەشىنە دەيىن يران بيلىگىنىڭ نارازىلىقتاردى باسۋ بارىسىندا كەمىندە 648 ادام قازا تاپقان، ولاردىڭ ىشىندە توعىز كامەلەتكە تولماعان بار. دەگەنمەن، نورۆەگيادا ورنالاسقان ۇيىمنىڭ باعالاۋىنشا، قازا تاپقاندار سانى التى مىڭنان اسۋى مۇمكىن.
قۇقىق قورعاۋشىلاردىڭ ايتۋىنشا، يراندا 100 ساعاتتان استام ۋاقىتقا سوزىلعان ينتەرنەتتىڭ بۇعاتتالۋىنا بايلانىستى بۇل اقپاراتتى تاۋەلسىز تۇردە تەكسەرۋ «وتە قيىن». ولاردىڭ باعالاۋىنشا، ەلدە شامامەن 10 مىڭ ادام قاماۋعا الىنعان.
