ەستونيا پرەمەر-ءمينيسترى كريستەن ميحال رەسەيگە قاتىستى قاتاڭ مالىمدەمەلەر جاساۋدان باس تارتپايتىنىن ايتتى، دەپ حابارلايدى “ادىرنا” ۇلتتىق پورتالى DW-عا سىلتەپ.
ول اقش تاراپىنىڭ ماسكەۋگە قاتىستى ريتوريكانى جۇمسارتۋ جونىندەگى ۇسىنىستارىنا قاراماستان، رەسەي تاراپىنان تونەتىن قاۋىپ تۋرالى اشىق ايتۋدى جالعاستىراتىنىن جەتكىزدى.
30 قازاندا Delfi باسىلىمىنا بەرگەن سۇحباتىندا ۇكىمەت باسشىسى ديكتاتورلارعا جاعىمپازدانۋ قورلىققا اكەلەتىنىن جانە مۇنداي جاعدايدا بوستاندىقتان ايىرىلۋ قاۋپى بار ەكەنىن ايتتى.
«مەن ءوز ءسوزىمدى تەجەمەيمىن. پۋتين – ايەلدەر مەن بالالاردى ءولتىرىپ جاتقان ديكتاتور. ونى ساياساتىن وزگەرتۋگە ماجبۇرلەمەيىنشە، ول بۇل ارەكەتىن جالعاستىرا بەرەدى»، – دەدى كريستەن ميحال.
پرەمەر-ءمينيستردىڭ سوزىنشە، اقش پرەزيدەنتى دونالد ترامپپەن سوڭعى رەت جازدا انكارادا كەزدەسكەن. الايدا سول كەزدە رەسەيگە قاتىستى مالىمدەمەلەردى جۇمسارتۋ ماسەلەسى كوتەرىلمەگەن.
بۇعان دەيىن Reuters اگەنتتىگى پەنتاگون وكىلدەرى لاتۆيا، ليتۆا جانە ەستونيا وكىلدەرىمەن ەكىجاقتى كەزدەسۋلەردە رەسەيگە قاتىستى وتكىر مالىمدەمەلەردەن باس تارتۋعا كەڭەس بەرگەنىن حابارلاعان. اگەنتتىك دەرەككوزدەرىنىڭ مالىمەتىنشە، اقش قورعانىس ءمينيسترىنىڭ ساياسات جونىندەگى ورىنباسارى ەلبريدج كولبي بالتىق ەلدەرىنىڭ ءبىرىنىڭ وكىلىنە رەسەيدىڭ ارانداتۋىنا جول بەرمەۋ كەرەكتىگىن ايتقان.
ال ليتۆا پرەزيدەنتى گيتاناس ناۋسەدانىڭ كەڭسەسى اقش تاراپىنان رەسەيگە قاتىستى مالىمدەمەلەردى جۇمسارتۋ جونىندە ەشقانداي ءوتىنىش تۇسپەگەنىن ايتتى.
