AQŞ prezidentı Donald Tramp İranmen sauda qatynasyn jürgızetın barlyq elderge 25 paiyzdyq kedendık baj salyǧyn engızetının mälımdedı, dep habarlaidy "Adyrna" ūlttyq portaly.
Tramp aqparatty Truth Social äleumettık jelısınde jazdy.
«Osy sätten bastap İslam Respublikasymen — İranmen — biznes jürgızetın kez kelgen el AQŞ-pen jasalatyn barlyq kommersiialyq operasiialar üşın 25 paiyzdyq baj salyǧyn töleidı. Būl şeşım tüpkılıktı jäne qaita qarauǧa jatpaidy», — dep jazdy Aq üi basşysy 12 qaŋtarda.
Donald Tramptyŋ aituynşa, būl şara İran ükımetıne qysym körsetu maqsatynda qabyldanǧan. Aq üi basşysy bilıktıŋ el ışındegı narazylyq aksiialaryn küşpen basyp-janşyp otyrǧanyn atap ötıp, būǧan deiın narazylyq bıldıruşılerge kömektesetının mälımdegen bolatyn.
Bloomberg agenttıgınıŋ mälımetınşe, İrannyŋ negızgı sauda serıktesterı qatarynda Ündıstan, Qytai jäne Türkiia bar. Agenttık atap ötkendei, Qytai önımderıne qosymşa 25 paiyzdyq tarif engızu Donald Tramptyŋ ötken jyldyŋ soŋynda QHR töraǧasy Si Szinpinmen jasaǧan sauda «bıtımın» būzuy mümkın.
İranda jappai tolqular jeltoqsan aiynyŋ soŋynan berı jalǧasyp keledı. Narazylyqtar bastapqyda rial baǧamynyŋ kürt qūldyrauy men eldegı ekonomikalyq jaǧdaidyŋ naşarlauynan tuyndaǧan. Keibır qalalarda mitingıler qūqyq qorǧau organdarymen qaqtyǧysqa ūlasyp, qoldanystaǧy saiasi jüiege qarsy ūrandarmen qatar jürgen.
Iran Human Rights qūqyq qorǧau ūiymynyŋ deregınşe, 12 qaŋtar keşıne deiın İran bilıgınıŋ narazylyqtardy basu barysynda kemınde 648 adam qaza tapqan, olardyŋ ışınde toǧyz kämeletke tolmaǧan bar. Degenmen, Norvegiiada ornalasqan ūiymnyŋ baǧalauynşa, qaza tapqandar sany alty myŋnan asuy mümkın.
Qūqyq qorǧauşylardyŋ aituynşa, İranda 100 saǧattan astam uaqytqa sozylǧan internettıŋ būǧattaluyna bailanysty būl aqparatty täuelsız türde tekseru «öte qiyn». Olardyŋ baǧalauynşa, elde şamamen 10 myŋ adam qamauǧa alynǧan.
