اقش پرەزيدەنتى دونالد ترامپ CNN, MS NOW جانە Politico اقپارات قۇرالدارىنىڭ جۋرناليستەرىنە اق ۇيگە كىرۋگە تىيىم سالدى، دەپ حابارلايدى "ادىرنا".
بۇل تۋرالى ول 18 قىركۇيەكتە Truth Social الەۋمەتتىك جەلىسىندەگى پاراقشاسىندا مالىمدەدى.
DW مالىمەتىنشە، ترامپ اتالعان اقپارات قۇرالدارىن «جالعان جاڭالىقتار تاراتتى» دەپ ايىپتاپ، ولاردىڭ پرەزيدەنت پەن اقش اكىمشىلىگىنىڭ قىزمەتىن جاريالاۋ كەزىندە «ويدان شىعارىلعان اقپارات پەن وتىرىك» تاراتاتىنىن جازعان. سونىمەن قاتار ول باسقا دا اقپارات قۇرالدارىنا قاتىستى وسىنداي شارا قولدانىلۋى مۇمكىن ەكەنىن ايتتى.
اق ءۇيدىڭ بۇل شەشىمى CNN, MS NOW جانە Politico جۋرناليستەرىنىڭ بريفينگتەر مەن پرەزيدەنتتىڭ قاتىسۋىمەن وتەتىن كەيبىر ءىس-شارالارعا قاتىسۋىنا اسەر ەتەدى.
CNN بۇل شەشىمدى ءباسپاسوز بوستاندىعىنا جاسالعان زاڭسىز ارەكەت دەپ باعالاپ، وعان قارسى شىعاتىنىن جازدى. ال Politico رەداكتسياسى قازىرگى جانە بولاشاق اكىمشىلىكتەردىڭ قىزمەتىن وبەكتيۆتى تۇردە جاريالاۋدى جالعاستىراتىنىن جانە جۋرناليستەردىڭ كونستيتۋتسيادا بەكىتىلگەن قۇقىقتارىن قورعاۋعا نيەتتى ەكەنىن حابارلادى.
ايتا كەتەيىك، اقش پرەزيدەنتى ترامپتىڭ بۇعان دەيىن دە بىرقاتار اقپارات قۇرالدارىنىڭ اق ۇيدەگى ءىس-شارالارعا قاتىسۋىنا شەكتەۋ قويعانى بەلگىلى. 2025 جىلى ونىڭ اكىمشىلىگى Associated Press اگەنتتىگىنىڭ كەيبىر ءىس-شارالارعا قاتىسۋىنا شەكتەۋ ەنگىزگەن. بۇعان اگەنتتىكتىڭ مەكسيكا شىعاناعىن «امەريكا شىعاناعى» دەپ اتاۋ تۋرالى پرەزيدەنت تالابىن ورىنداماۋى سەبەپ بولعان.
اقش-تاعى ءباسپاسوز ۇيىمدارى مەن قۇقىق قورعاۋشىلار قازىرگى شەشىمنىڭ كونستيتۋتسياداعى ءسوز جانە ءباسپاسوز بوستاندىعىنا قاتىستى نورمالارعا سايكەستىگىنە كۇمان كەلتىرىپ وتىر. ماسەلە سوتتا قارالۋى مۇمكىن.
