الەمنىڭ ءبىراز جۇرتى روجدەستۆونى اتاپ ءوتىپ جاتىر. حريستيان ءدىنىنىڭ قاسيەتتى مەيرامدارىنىڭ ءبىرى. ءدال وسى كۇنى رەسەيباسى پۋتين: «رەسەي، ياعني ءبىز ۋكرايناداعى "ارنايى وپەراتسيا" بارىسىندا "قۇدايدىڭ قاسيەتتى تاپسىرماسىن" ورىنداپ جاتىرمىز»،-دەدى.
سوزبە-ءسوز: "بوگا چاستو نازىۆايۋت سپاسيتەلەم، پوتومۋ چتو ون پريشەل، چتوبى وسۆوبوديت ۆسەح ليۋدەي. ي ناشي ۆوينى "كاك بى پو پورۋچەنيۋ گوسپودا يسپولنيايۋت ەتۋ سامۋيۋ ميسسيۋ — زاششيتى وتەچەستۆا، سپاسەنيا رودينى ي ەە ليۋدەي".
قۇدايدىڭ قاسيەتتى تاپسىرماسى بەيبىت حالىقتى قىرۋ ما؟ البەتتە جوق! ەندەشە بۇنىڭ دياگنوزى بىلاي: نە پۋتين ءوزىن "قۇداي" سانايدى، نە قۇدايدىڭ اتىن جامىلىپ، وزىنىكىن ىستەپ جۇرگەن كۇناھار!
جالپى ۋكرايناداعى قانقاساپ سوعىس باستالعالى بەرى پۋتين قۇداي تۋرالى بىرنەشە مارتە ايتتى. الگىندە عانا: "مەن قۇدايعا سەنەمىن. ول ءبىزدى، رەسەيلىكتەردى قيىن-قىستاۋ جاعدايعا قالدىرعان جوق. قالدىرمايدى دا. ءبىز بۇل سوعىستاعى العا قويعان ماقساتتارىمىزعا جەتپەي تىنبايمىز", - دەدى.
مۇنى ەستىگەن الەم جۇرتى: "ونىڭ قۇدايعا سەنەتىنىنە قۇداي دا سەنبەيتىن شىعار", - دەدى.
ول وسىعان دەيىن وتكەن جىلى اسكەريلەردى ماراپاتتاپ جاتىپ، بۇل سوعىستى باستاۋىنىڭ سەبەبى رەتىندە: "وسىلاي بولعانى قۇدايعا كەرەك بولعان شىعار", - دەپ سويلەگەن.
ال 2024 جىلى پۋتين: "2025 جىلى سوعىس اياقتالادى دەگەنگە سەنەسىز بە؟" دەگەن سۇراققا: "مەن قۇدايعا سەنەمىن. قۇداي ءبىزدى قولدايدى", - دەپ جاۋاپ بەرگەن.
ءدال سول جىلى كرەمل قوجايىنى: "رەسەيدى مەن ەمەس، قۇداي باسقارىپ كەلە جاتىر. ال حالىقتىڭ ارقاسىندا ءومىر سۇرۋدە", - دەپ سويلەگەنى دە بولعان اڭگىمە.
بىلتىر جەلتوقسان ايىندا پۋتين: "ەگەر قۇداي بار بولسا، ال ونىڭ بار ەكەنىنە ءشۇبام جوق، وندا قۇداي جەردەگى ادامداردىڭ شىركەۋ-شىركەۋگە ءبولىنىپ كەتكەنىن بىلمەيتىن دە شىعار. ءبىزدى، ءبارىمىزدى ورتاق قۇندىلىقتار بىرىكتىرەدى", - دەپ كولگىرسىگەن. ول بۇل سوزدەردى ۋكراينانىڭ ماسكەۋ پاتريارحاتىنان ءبولىنىپ شىعىپ، ءدىن ازاتتىعىن الۋىنا باعىتتاپ ايتقان.
