تاجىكستان پرەزيدەنتى ەمومالي راحمون رەسەي پرەزيدەنتى ۆلاديمير پۋتينگە ونى III دارەجەلى «وتانعا سىڭىرگەن ەڭبەگى ءۇشىن» وردەنىمەن ماراپاتتاۋ تۋرالى شەشىمى ءۇشىن العىس ايتىپ، بۇل ماراپاتتى بۇكىل تاجىك حالقىنىڭ ەڭبەگى دەپ اتادى، دەپ جازادى "ادىرنا".
«ۆلاديمير ۆلاديميروۆيچ، مەنى «وتانعا سىڭىرگەن ەڭبەگى ءۇشىن» وردەنىمەن ماراپاتتاۋ تۋرالى شەشىم قابىلداعانىڭىز ءۇشىن راحمەت. مەن بۇل ماراپاتتى تاجىك-رەسەي قارىم-قاتىناسىن نىعايتۋعا قوسقان قاراپايىم ۇلەسىم ءۇشىن جوعارى باعا رەتىندە قابىلدايمىن»، - دەدى راحمون ماراپاتتى تاپسىرعاننان كەيىن.
ول مۇنى «ءبىرىنشى كەزەكتە بۇكىل تاجىكستان حالقىنىڭ باۋىرلاس رەسەيمەن ستراتەگيالىق سەرىكتەستىك پەن وداقتاستىق قاتىناستارىنىڭ تۇراقتى دامۋىنا سىڭىرگەن ەڭبەگىمەن» بايلانىستىراتىنىن اتاپ ءوتتى.
پۋتين تاجىكستان باسشىسىن ماراپاتتاۋ تۋرالى جارلىققا 2022 جىلدىڭ قازان ايىندا قول قويعان. راحمون مەملەكەتتىك ناگرادامەن رەسەي فەدەراتسياسى مەن تاجىكستان رەسپۋبليكاسى اراسىنداعى ستراتەگيالىق سەرىكتەستىك پەن وداقتاستىق قاتىناستارىن نىعايتۋعا، سونداي-اق وڭىرلىك تۇراقتىلىق پەن قاۋىپسىزدىكتى قامتاماسىز ەتۋگە قوسقان زور ۇلەسى ءۇشىن ماراپاتتالدى.
ءراسىم بارىسىندا پۋتين راحمون ەكەۋى ۇزاق جىلدار بويى بىرگە جۇمىس ىستەگەندە ءوزارا ءتيىمدى شەشىمدەر تابۋعا مۇمكىندىك بەرەتىن ءونىمدى جانە سەنىمدى قارىم-قاتىناس ورناتقانىن اتاپ ءوتتى. پۋتين بۇل سىيلىقتى راحموننىڭ ماسكەۋ مەن دۋشانبە اراسىنداعى دوستىقتى، ستراتەگيالىق سەرىكتەستىك پەن وداقتاستىقتى نىعايتۋعا قوسقان وراسان زور جەكە ۇلەسىن مويىنداۋ ەكەنىن اتاپ ءوتتى.
