ماسكەۋدە وتكەن ەاەو ءسامميتى كەزىندە رەسەي پرەزيدەنتى ۆلاديمير ءپۋتيننىڭ قاسىم-جومارت توقاەۆقا تاپسىرعان حاتىنىڭ مازمۇنىن ايتىلدى. بۇل تۋرالى مەملەكەت باسشىسىنىڭ ءباسپاسوز حاتشىسى رۋسلان جەلدىباي Tengrinews.kz-كە بەرگەن جاۋابىندا ايتتى، دەپ حابارلايدى “ادىرنا” ۇلتتىق پورتالى.
ول حاتتا رەسەيلىك تاراپتىڭ ەاەو ەلدەرى باسشىلارىنىڭ شاعىن قۇرامداعى كەزدەسۋىندە قويىلعان سۇراققا جاۋابى جازىلعان. كەزدەسۋدە قازاق كومپانيالارىنىڭ تاۋارلارىن رەسەيدىڭ ىشكى تاريفتەرى بويىنشا تاسىمالداۋ تۋرالى ماسەلە ايتىلعان ەدى. وسى ماسەلە بويىنشا رەسەي ءوز ۇستانىمىن جەتكىزدى. ياعني، رەسەي ۇكىمەتى قازاقستان اۋماعىندا مەجەلى پۋنكتى بار تاۋارلار جەڭىلدەتىلگەن ءتاريفتى پايدالانا الادى دەپ ەسەپتەيدى. ال رەسەي اۋماعى بويىنشا ترانزيتپەن جۇرەتىن تاۋارلارعا ەكسپورتتىق تاريفتەر قولدانىلۋعا ءتيىس دەپ سانايدى.
پرەزيدەنت ۇكىمەتكە 2015 جىلعى ەاەو قۇرۋ تۋرالى شارت قاعيداتتارى نەگىزىندە وسى ماسەلە بويىنشا رەسەي تاراپىمەن كەلىسسوزدەردى جالعاستىرۋ تۋرالى تاپسىرما بەردى، – دەدى رۋسلان جەلدىباي.
ەسكە سالايىق، قاسىم-جومارت توقاەۆ ماسكەۋدە وتكەن ەاەو-نىڭ سامميتىنە قاتىسىپ، بىرنەشە ماڭىزدى مالىمدەمە جاساعان بولاتىن.
