الماتى قالاسى ادىلەت دەپارتامەنتىنىڭ باستاماسىمەن جۇزەگە اسىرىلىپ جاتقان «زاڭ مەن ءتارتىپ» رەسپۋبليكالىق اكتسياسى اياسىندا قۇقىقتىق مادەنيەتتى ارتتىرۋعا جانە ازاماتتاردىڭ زاڭ الدىنداعى جاۋاپكەرشىلىگىن تۇسىندىرۋگە باعىتتالعان كەشەندى جۇمىستار جالعاسۋدا. اتالعان اكتسيا شەڭبەرىندە الماتى قالاسى ادىلەت دەپارتامەنتىنىڭ مۇلىكتى مەملەكەت كىرىسىنە اينالدىرۋ بويىنشا اۋماقتىق ءبولىمىنىڭ فيليالىندا قىزمەت اتقاراتىن مەملەكەتتىك سوت ورىنداۋشىسى ازامات يلكەنۇلى دجۋمانازاروۆ، تاجىريبەلى ادۆوكات ارمان ورازباقوۆ، سونداي-اق الماتى قالاسى ەڭبەك موبيلدىلىگى ورتالىعىنىڭ مانساپ ورتالىعى جانىنداعى ىزدەنۋشىلەردى قولداۋ ءبولىمىنىڭ مامانى جانبولات حازبۋلاتۇلى كەنجەعۇل الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى №72 مەكەمەگە ارنايى بارىپ، سوتتالعان ازاماتتارمەن كەزدەسۋ وتكىزدى.
ءىس-شارا بارىسىندا مەكەمەدە جازاسىن وتەپ جاتقان ازاماتتارعا جان-جاقتى قۇقىقتىق كەڭەستەر بەرىلىپ، ولاردىڭ قازاقستان رەسپۋبليكاسىنىڭ زاڭناماسىنا سايكەس يەلەنەتىن نەگىزگى قۇقىقتارى مەن اتقاراتىن مىندەتتەرى ەگجەي-تەگجەيلى ءتۇسىندىرىلدى. سونىمەن قاتار قاتىسۋشىلارعا 2025 جىلعى 16 قىركۇيەكتەن باستاپ قولدانىسقا ەنگىزىلگەن زاڭناماداعى وزگەرىستەر تۋرالى تولىق اقپارات ۇسىنىلىپ، بۇل وزگەرىستەردىڭ سوتتالعان ازاماتتاردىڭ قۇقىقتىق جاعدايىنا، الەۋمەتتىك جانە ەڭبەك سالاسىنداعى مۇمكىندىكتەرىنە قالاي اسەر ەتەتىنى كەڭىنەن باياندالدى.
كەزدەسۋ اياسىندا ەڭبەككە ورنالاسۋ، بوساتىلعاننان كەيىنگى الەۋمەتتىك بەيىمدەلۋ، مەملەكەتتىك قولداۋ شارالارىن الۋ جانە زاڭدى كومەككە جۇگىنۋ ءتارتىبى تۋرالى ءتۇسىندىرۋ جۇمىستارى جۇرگىزىلدى. الماتى قالاسى ەڭبەك موبيلدىلىگى ورتالىعىنىڭ وكىلى سوتتالعان ازاماتتارعا ەڭبەك نارىعىنداعى مۇمكىندىكتەر، قايتا دايارلاۋ جانە جۇمىسقا ورنالاسۋعا جاردەمدەسۋ تەتىكتەرى جونىندە مالىمەت بەرىپ، قوعامعا بەيىمدەلۋ جولدارىن ءتۇسىندىردى. ال ادۆوكات تاراپىنان قۇقىقتىق كومەك الۋ جولدارى، وتىنىشتەر مەن شاعىمدار بەرۋ ءتارتىبى جانە زاڭ شەڭبەرىندە ءوز قۇقىقتارىن قورعاۋ مۇمكىندىكتەرى تۋرالى ناقتى تۇسىندىرمەلەر بەرىلدى.
اتالعان ءىس-شارانىڭ نەگىزگى ماقساتى – سوتتالعان ازاماتتاردىڭ قۇقىقتىق ساۋاتتىلىعىن ارتتىرۋ، ولاردىڭ زاڭ تالاپتارىن دۇرىس تۇسىنۋىنە جاعداي جاساۋ، سونداي-اق جازاسىن وتەۋ مەرزىمى اياقتالعاننان كەيىن قوعامعا قايتا بەيىمدەلۋىنە جانە تولىققاندى ومىرگە ورالۋىنا ىقپال ەتۋ بولىپ تابىلادى. وسىنداي ءتۇسىندىرۋ جانە اقپاراتتىق كەزدەسۋلەر ازاماتتاردىڭ قۇقىقتىق ساناسىن قالىپتاستىرۋعا، زاڭعا قۇرمەتپەن قاراۋعا جانە قۇقىق بۇزۋشىلىقتىڭ الدىن الۋعا باعىتتالعان ماڭىزدى قادامداردىڭ ءبىرى سانالادى.
