الماتىدا بيىل تۇرعىن ۇيلەردىڭ قاسبەتىن اۋقىمدى جاڭارتۋ جوسپارلانىپ وتىر. قالا اكىمدىگىنىڭ مالىمەتىنشە، نەگىزگى ماقسات – عيماراتتاردىڭ تاريحي كەلبەتىن ساقتاي وتىرىپ، ولاردىڭ سىرتقى كورىنىسىن زامان تالابىنا ساي جاڭعىرتۋ.
«الماتىباسجوسپار» كومپانياسىنىڭ باس ديرەكتورى، ساۋلەتشى اسحات ءسادۋوۆتىڭ ايتۋىنشا، باعدارلاما قالالىق ورتانىڭ ساۋلەتتىك كەلبەتىن جاقسارتۋمەن قاتار، ۇيلەردىڭ پايدالانۋ ساپاسىن ارتتىرۋعا باعىتتالعان. اتاپ ايتقاندا، جىلۋ جانە دىبىس وقشاۋلاۋىن كۇشەيتۋ، سونداي-اق ىلعالدان قورعاۋ ماسەلەلەرى قامتىلادى.
«ەڭ الدىمەن باعدارلاماعا وتكەن عاسىردىڭ 1950-جىلدارىنىڭ سوڭىندا سالىنعان، قاسبەتى توزعان ۇيلەر ەنگىزىلەدى. نىسانداردى ىرىكتەۋدە ولاردىڭ ورنالاسۋ ورنى دا ماڭىزدى – قالانىڭ ساۋلەتتىك كەلبەتىن ايقىندايتىن نەگىزگى ماگيسترال كوشەلەر بويىنداعى عيماراتتارعا باسىمدىق بەرىلەدى. جوبالىق شەشىمدەر ازىرلەۋ بارىسىندا تاريحي ورتا مەن قالىپتاسقان ساۋلەتتىك انسامبل ەرەكشەلىكتەرى جان-جاقتى ەسكەرىلەدى»، – دەدى ول.
اكىمدىكتە بارلىق جۇمىس بىلىكتى مەردىگەر ۇيىمدار تاراپىنان، ساۋلەت جانە قالا قۇرىلىسى باقىلاۋ باسقارمالارىنىڭ تىكەلەي قاتىسۋىمەن جۇرگىزىلەتىنىن ايتتى.
ء«اربىر نىساندا جۇمىس باستالار الدىندا تۇرعىندارمەن مىندەتتى تۇردە كەزدەسۋلەر وتكىزىلەدى. وندا جۇمىس كەستەسى تالقىلانىپ، ۇيىمداستىرۋ ماسەلەلەرى شەشىلىپ، تۇرعىنداردىڭ ۇسىنىس-پىكىرى ەسكەرىلەدى. قورىتىندى جوبالىق شەشىمدەر مەنشىك يەلەرىنىڭ پىكىرىن ەسكەرە وتىرىپ قابىلدانادى. تۇرعىنداردى قۇلاقتاندىرۋدىڭ نەگىزگى ءتاسىلى – جۇمىس باستالار الدىنداعى تىكەلەي كەزدەسۋلەر، وندا جوبانىڭ بارلىق كەزەڭى ەگجەي-تەگجەيلى ءتۇسىندىرىلىپ، تۇرعىنداردىڭ ۇسىنىسى قاراستىرىلادى»، - دەدى المالى اۋدانىنىڭ اكىمى ارمان ءشامشين.
«قازاقستاننىڭ تاس وڭدەۋ سالاسى وداعى» زتب باسقارماسىنىڭ توراعاسى داۋرەن اعزىموۆ رەكونسترۋكتسيا كەزىندە قولدانىلاتىن ماتەريالداردىڭ ساپاسىنا ەرەكشە نازار اۋدارىلاتىنىنا توقتالدى. ونىڭ ايتۋىنشا، ماتەريالدارعا بەرىكتىك، ۇزاق مەرزىمدىلىك، كليماتتىق اسەرلەرگە توزىمدىلىك، ەكولوگيالىق قاۋىپسىزدىك جانە قولدانىستاعى قۇرىلىس نورمالارىنا سايكەستىك بويىنشا قاتاڭ تالاپتار قويىلادى.
«ماتەريالداردىڭ ەستەتيكالىق سيپاتى مەن عيماراتتىڭ ساۋلەتتىك كەلبەتىمەن ۇيلەسىمى دە مۇقيات سارالانادى. قاپتاۋ جۇمىستارىنا ميكروكەۋەكتى قۇرىلىمى بار تاس پايدالانىلادى. مۇنداي ماتەريال قابىرعالاردىڭ تابيعي جەلدەتىلۋىن قامتاماسىز ەتىپ، ىلعالدىڭ جينالۋىنا جانە كوگەرۋدىڭ پايدا بولۋىنا جول بەرمەيدى، سونىمەن قاتار جوعارى دەڭگەيدە جىلۋ جانە دىبىس وقشاۋلاۋ قاسيەتىنە يە. جۇمىستىڭ سوڭعى كەزەڭىندە قاسبەتكە گيدروفوبتى وڭدەۋ جۇرگىزىلىپ، ول جاۋىن-شاشىننان قورعاپ، قىزمەت ەتۋ مەرزىمىن ەداۋىر ۇزارتادى»، – دەدى داۋرەن اعزىموۆ.
ونىڭ ايتۋىنشا، 2026 جىلدىڭ باسىندا پانفيلوۆ كوشەسى، 126; جامبىل كوشەسى، 48; نازارباەۆ داڭعىلى، 149 مەكەنجايلارىنداعى ءۇش تۇرعىن ءۇيدىڭ قاپتاۋ جۇمىستارى اياقتالىپ، بۇگىندە ءبىرتۇتاس ءارى ۇيلەسىمدى ساۋلەتتىك انسامبل قالىپتاستىرعان. «بۇل ناتيجەلەر اتقارىلعان جۇمىستاردىڭ جوعارى ساپاسىن جانە قولدانىلعان تەحنولوگيالىق شەشىمدەردىڭ تيىمدىلىگىن ايقىن كورسەتتى. ەڭ باستىسى، بارلىق جۇمىس پيك نەمەسە ميب قاراجاتى ەسەبىنەن ەمەس، قالا بيۋدجەتى ەسەبىنەن جۇزەگە اسىرىلدى»، – دەدى ول.
قاسبەتى جاڭارتىلعان ۇيلەردىڭ تۇرعىندارى جۇمىستى وڭ باعالاپ وتىر. «قالا ايتارلىقتاي جاڭارىپ كەلەدى، قاسبەتتەر ۇقىپتى، كوشەلەر كورىكتى ءارى ۇيلەسىمدى بولا ءتۇستى. بۇل اسىرەسە، ورتالىق كوشەلەردە ايقىن بايقالادى»، – دەدى الماتىلىق تۇرار راحىمبەرلين.
فوتوسۋرەتتەر «دەيىن / كەيىن»
پانفيلوۆ ك-ءسى، 126
جامبىل ك-ءسى، 48
نازارباەۆ داڭعىلى، 149
جوندەلىپ جاتقان ۇيلەردىڭ فوتوسۋرەتتەرى
شەۆچەنكو ك-ءسى، 57
نازارباەۆ داڭعىلى، 161
نازارباەۆ داڭعىلى، 163
