بۇگىن «Almaty Arena» سپورت جانە مادەنيەت سارايى كوكتەمنىڭ اۋەزدى ىرعاعىمەن مىڭداعان بالا جۇرەگىن توعىستىرعان بىرەگەي مادەني وقيعانىڭ ورتالىعىنا اينالدى. الماتى قالاسى اكىمدىگىنىڭ قولداۋىمەن ءبىلىم باسقارماسى ۇيىمداستىرعان «دومبىرا ءۇنى» اتتى اۋقىمدى بالالار فلەشموبى جاڭا ۇلتتىق رەكورد ورناتىپ، ەل شەجىرەسىنە التىن ارىپتەرمەن جازىلدى.
يدەيا جانە دايىندىق: مەكتەپ انسامبلدەرىنەن بىرىككەن وركەسترگە دەيىن
اتالعان جوبا ءبىلىم باسقارماسىنىڭ يگى باستاماسىنىڭ جارقىن كورىنىسى بولدى. ونىڭ باستى ماقساتى – ناۋرىز مەيرامى قارساڭىندا قالا تۇرعىندارى مەن قوناقتارىنا ەرەكشە مەرەكەلىك كوڭىل-كۇي سىيلاۋ، سونداي-اق مەگاپوليستەگى جاس مۋزىكانتتاردى ورتاق شىعارماشىلىق ارناعا توعىستىرۋ. فلەشموبتىڭ نەگىزگى ميسسياسى – دومبىرانىڭ قوڭىر ءۇنى ارقىلى وسكەلەڭ ۇرپاققا اتا-بابا مۇراسىن جەتكىزۋ، ۇلتتىق رۋحتى اسقاقتاتۋ جانە قازاق مادەنيەتىنىڭ كوركەمدىگىن كەڭىنەن تانىتۋ.
جوباعا دايىندىق جۇمىستارى بىرنەشە اي بۇرىن باستالدى. بىرەگەي مۋزىكالىق پوپۋرري ازىرلەۋ بارىسىندا ءداستۇر مەن زاماناۋي اۋەن ۇيلەسىمى شەبەر ۇشتاستىرىلدى. باعدارلاماعا تولەگەن مۇحامەدجانوۆ پەن التىنبەك قورازباەۆتىڭ تۋىندىلارى، نۇرعيسا تىلەنديەۆتىڭ كۇيلەرى، سونداي-اق قۇرمانعازىنىڭ ايگىلى «بالبىراۋىن» كۇيى زاماناۋي وڭدەۋدە ەنگىزىلدى. سونىمەن قاتار، ارنايى وسى قويىلىمعا ارنالعان جاساندى ينتەللەكت تەحنولوگيالارى ارقىلى دايىندالعان اۆتورلىق بەينەمازمۇن كورەرمەن نازارىنا ۇسىنىلدى.
دايىندىق جۇمىستارى قالانىڭ بارلىق ءبىلىم بەرۋ ۇيىمدارىن قامتىدى: الماتىداعى 200-دەن استام مەكتەپ پەن قوسىمشا ءبىلىم بەرۋ ۇيىمدارىندا بىرىككەن دومبىرا انسامبلدەرى قۇرىلدى. بىرنەشە اپتا بويى مىڭعا جۋىق پەداگوگ 7-10 سىنىپ وقۋشىلارىنان 11 000 جاس دومبىراشىنى تاريحي ساحناعا دايىندادى.
ءىس-شارا بارىسى: بىرلىك پەن بۇرىن-سوڭدى بولماعان اۋقىم
2026 جىلعى 17 ناۋرىز كۇنى «Almaty Arena» الاڭى الىپ كونتسەرتتىك كەڭىستىككە اينالدى. قاتىسۋشىلاردى تاسىمالداۋ ءۇشىن 236 اۆتوبۋس جۇمىلدىرىلىپ، ءىس-شارا جوعارى دەڭگەيدە ۇيىمداستىرىلدى.
بەلگىلەنگەن ۋاقىتتا 11 000 وقۋشى بىرىككەن وركەستر قۇرامىندا ارنايى دايىندالعان مۋزىكالىق ءپوپۋرريدى ءبىر مەزەتتە ورىندادى. مىڭداعان دومبىرا ءۇنى ءبىر ارنادا ۇندەسىپ، قازاقستاننىڭ جاس بۋىنىنىڭ بىرلىگى مەن رۋحاني تۇتاستىعىن ايقىن كورسەتتى. اۋقىمدىلىعى، ورىنداۋشىلاردىڭ شەبەرلىگى جانە ۇلتتىق مادەنيەتكە دەگەن قۇرمەت ۇيلەسكەن بۇل كورىنىس كورەرمەندەر مەن قوناقتارعا ەرەكشە اسەر قالدىردى.
رەكوردتى تىركەۋ: قازاقستان رەكوردتار كىتابىنداعى جاڭا بەلەس
ءىس-شارانىڭ شارىقتاۋ شەگى – جەتىستىكتىڭ رەسمي تىركەلۋى بولدى. الماتى قالاسىنىڭ ءبىلىم باسقارماسىنىڭ باستاماسىن قازاقستان رەكوردتار كىتابى (قۇرجك) قولدادى. ۇيىمنىڭ باس رەداكتورى قۋانىش امىرقۇلۇلى تازابەكوۆتىڭ اتىنا الدىن الا رەسمي حات جولدانىپ، بارلىق تالاپتاردىڭ ساقتالۋىن قامتاماسىز ەتۋ ءۇشىن ساراپشىلار ءىس-شاراعا ارنايى قاتىستى.
قۇرجك وكىلدەرى قاتىسۋشىلار سانىن ەسەپتەپ، ورىنداۋدىڭ ۇيلەسىمدىلىگى مەن ۇزاقتىعىن (4 مينۋت 38 سەكۋند), سونداي-اق باعدارلامانىڭ بىرەگەيلىگىن مۇقيات باعالادى. بۇعان دەيىنگى رەكوردتاردان ەرەكشەلىگى – الماتىلىق وقۋشىلار ءبىر عانا كۇي ەمەس، كلاسسيكالىق جانە زاماناۋي شىعارمالاردان قۇرالعان كۇردەلى ءپوپۋرريدى ورىندادى.
قورىتىندىسىندا قۇرجك باس رەداكتورى ق.ءا. تازابەكوۆ «جاپپاي جەتىستىكتەر» ساناتى بويىنشا جاڭا ۇلتتىق رەكوردتىڭ ورناتىلعانىن رەسمي تۇردە جاريالاپ، الماتى قالاسى اكىمدىگىنىڭ ءبىلىم باسقارماسىنا ارنايى سەرتيفيكاتتى سالتاناتتى تۇردە تابىستادى.
بۇل جەتىستىك وتكەن جىلى تالدىقورعاندا ورناتىلعان رەكوردقا (5 000 قاتىسۋشى) لايىقتى جاۋاپ بولىپ، الماتى قالاسىنىڭ ۇلتتىق داستۇرلەردى ساقتاۋدا كوشباسشىلىق ۇستانىمىن ايقىندادى. بۇعان دەيىنگى رەكوردتار اتىراۋدا (2010 ج. – 1 073 ادام), ورالدا (2010 ج. – 1 700 ادام) جانە استانادا (2024 ج. – 3 200 ادام) تىركەلگەن بولاتىن. الماتىنىڭ جاڭا كورسەتكىشى الەمدىك گيننەس رەكوردىنا (2010 ج. قىتايدا – 10 450 دومبىراشى) بارىنشا جاقىنداپ، قازاقستاندىق مادەنيەتتىڭ زور الەۋەتىن پاش ەتتى.
«دومبىرا ءۇنى» فلەشموبى – بۇل تەك اۋقىمدى مادەني شارا عانا ەمەس، ۇرپاقتار ساباقتاستىعىنىڭ ايقىن كورىنىسى، ۇلتتىق قۇندىلىقتاردىڭ ومىرشەڭدىگىن دالەلدەيتىن تاعىلىمدى باستاما. بۇل يگى ءىس جاس بۋىننىڭ ەل مادەنيەتىنىڭ بولاشاعىن سەنىمدى جالعاستىرا الاتىنىن كورسەتتى. ءىس-شارا سوڭىندا قاتىسۋشىلار ۇيىمشىلدىقپەن تاراسىپ، جۇرەكتەرىندە جارقىن اسەر مەن ەل تاريحىنا قوسقان ۇلەستەرى ءۇشىن ماقتانىش سەزىمىن الىپ قايتتى.
