19-20 مامىر كۇندەرى استانادا «التىن وردا – دالا وركەنيەتىنىڭ مودەلى: تاريح، ارحەولوگيا، مادەنيەت جانە بىرەگەيلىك» اتتى حالىقارالىق سيمپوزيۋم وتەدى، دەپ حابارلايدى "ادىرنا" ۇلتتىق پورتالى.
ءىس-شاراعا ەۋروپا، ازيا، سولتۇستىك امەريكا جانە تاياۋ شىعىستىڭ 20-دان استام ەلىنەن شامامەن 350 دەلەگات قاتىسادى. ولاردىڭ قاتارىندا عالىمدار، ارحەولوگتار، شىعىستانۋشىلار، تۇركىتانۋشىلار، ساياساتتانۋشىلار، مۋزەي قىزمەتكەرلەرى مەن حالىقارالىق ۇيىم وكىلدەرى بار. سيمپوزيۋم التىن وردا مۇراسى مەن ونىڭ ورتالىق ەۋرازيا وركەنيەتىنىڭ قالىپتاسۋىنداعى رولىنە ارنالادى. باعدارلاما اياسىندا پلەنارلىق وتىرىس جانە ون ارنايى عىلىمي سەكتسيا جۇمىسى ۇيىمداستىرىلادى.
قاتىسۋشىلار التىن وردانىڭ ساياسي تاريحىن، ارحەولوگيالىق زەرتتەۋلەردى، مادەني مۇرانى، تاريحي بىرەگەيلىك ماسەلەلەرىن جانە دالا وركەنيەتىنىڭ ايماق تاريحىنداعى ورنىن تالقىلايدى. شارانى قازاقستاننىڭ عىلىم جانە جوعارى ءبىلىم مينيسترلىگى، سىرتقى ىستەر مينيسترلىگى جانە مادەنيەت جانە اقپارات مينيسترلىگى بىرلەسىپ ۇيىمداستىرىپ وتىر.
ساراپشىلاردىڭ پىكىرىنشە، مۇنداي حالىقارالىق جيىندار جوشى ۇلىسى مۇراسىن زەرتتەۋگە جانە قازاقستاننىڭ تاريحي ديپلوماتياسىن دامىتۋعا مۇمكىندىك بەرەدى.
