الماتىنىڭ ناۋرىزباي اۋدانىندا 1290 وقۋشىعا ارنالعان №41 جاڭا مەكتەپ اشىلدى.
جاقىن كۇندەرى №223 مەكتەپتىڭ اشىلىپ، «شۇعىلا» شاعىناۋدانىندا №15 مەكتەپ-ينتەرنات پايدالانۋعا بەرىلەدى دەپ جوسپارلانىپ وتىر. بۇل تۋرالى قالالىق ءبىلىم باسقارماسىنىڭ وكىلدەرى حابارلادى.
2025 جىلى الماتىدا شامامەن 40 مىڭ ورىنعا ارنالعان 38 ءبىلىم بەرۋ نىسانى پايدالانۋعا بەرىلدى. ولاردىڭ قاتارىندا «كەلەشەك مەكتەپتەرى» ۇلتتىق جوباسى اياسىندا سالىنعان 20 مەكتەپ، قولدانىستاعى مەكتەپتەرگە قوسىمشا عيماراتتار، 7 بالاباقشا جانە تەحنيكالىق ءارى كاسىپتىك ءبىلىم بەرۋ مەكەمەلەرى بار.
الەۋمەتتىك ينفراقۇرىلىمدى دامىتۋ جۇمىستارى حالىق سانىنىڭ ءوسۋ قارقىنىن ەسكەرە وتىرىپ جۇرگىزىلىپ جاتىر. 2030 جىلعا دەيىنگى قاجەتتىلىك كارتالارى ازىرلەنگەن، وندا مەكتەپتەر، بالاباقشالار، قوسىمشا ءبىلىم بەرۋ نىساندارى مەن تەحنيكالىق جانە كاسىپتىك ءبىلىم بەرۋ (تجكب) جۇيەسىنە ارنالعان جاتاقحانالار قۇرىلىسى قامتىلعان.
بۇگىندە ناۋرىزباي اۋدانىندا 30,5 مىڭ ورىنعا ارنالعان 15 مەملەكەتتىك مەكتەپ جۇمىس ىستەيدى. سوعان قاراماستان شامامەن 3 مىڭ وقۋشى ورنىنا تاپشىلىق ساقتالىپ وتىر.
وسىعان وراي، قارقىندى قۇرىلىس ءجۇرىپ جاتقان اۋماقتاردا 5 جاڭا مەكتەپ سالۋ جوسپارلانعان. اتاپ ايتقاندا، التىن وردا، اباي، الاتاۋ كوشەلەرىنىڭ ماڭى، سونداي-اق قالقامان، تاۋ سامال شاعىناۋداندارى مەن ء«داستۇر» جانە «Lancashire» تۇرعىن ءۇي كەشەندەرى قامتىلماق.
سونىمەن قاتار بالاباقشا قۇرىلىسى دا قاتار جۇرگىزىلۋدە. قازىرگى ۋاقىتتا جالپى سىيىمدىلىعى 880 ورىن بولاتىن 3 نىساندا قۇرىلىس جۇمىستارى قارقىندى ءجۇرىپ جاتىر. ال بولاشاقتا تاعى 7 مەكتەپكە دەيىنگى مەكەمە سالۋ جوسپارلانعان.
«ناۋرىزباي اۋدانىندا جاڭا مەكتەپتىڭ اشىلۋى — الماتىنىڭ الەۋمەتتىك ينفراقۇرىلىمىن جۇيەلى دامىتۋعا باعىتتالعان اۋقىمدى جوسپاردىڭ ءبىر بولىگى. ءبىز جەكەلەگەن ماسەلەلەردى شەشۋ تاسىلىنەن ۇزاق مەرزىمدى ستراتەگيالىق جوسپارلاۋعا كوشتىك. 2030 جىلعا دەيىنگى قاجەتتىلىك كارتالارى الداعى جىلدارداعى دەموگرافيالىق جۇكتەمەنى ءدال بولجاۋعا جانە ءبىلىم نىساندارىن الداعى 2-3 جىلدا سۇرانىس جوعارى بولاتىن جەرلەردە سالۋعا مۇمكىندىك بەرەدى»، – دەدى الماتى قالاسى ءبىلىم باسقارماسىنىڭ وكىلدەرى.
