قازاقستان ەلەكتر قۋاتىن باسقا ەلدەردەن ساتىپ الماۋى كەرەك. بۇل تۋرالى پرەزيدەنت قاسىم-جومارت توقاەۆ ەنەرگەتيكا سالاسىنىڭ قىزمەتكەرلەرىمەن كەزدەسۋ بارىسىندا ايتتى، دەپ حابارلايدى «ادىرنا» ءتىلشىسى.
«تۇپتەپ كەلگەندە، بۇل – ۇلتتىق قاۋىپسىزدىك ماسەلەسى. بۇدان بولەك، ەلىمىزدىڭ زور ەنەرگەتيكالىق مۇمكىندىگىن ءتيىمدى قولدانۋ قاجەت. مىسالى، قازاقستان – كومىرگە باي ەل. جىل سايىن 110 ميلليون توننادان استام كومىر وندىرىلەدى. وسى ستراتەگيالىق ارتىقشىلىقتى دۇرىس پايدالانعان ءجون. ءبىز زاماناۋي ۇلگىدەگى «تازا كومىر» تەحنولوگياسىنا تەزىرەك كوشۋىمىز كەرەك. سول ارقىلى كومىر ستانتسيالارىنىڭ تيىمدىلىگىن ارتتىرا تۇسەمىز»،-دەدى ول.
پرەزيدەنت بىرنەشە قالادا جىلۋ ەلەكتر ورتالىقتارىن سالۋ كەرەكتىگىن اتاپ ءوتتى.
«كۋرچاتوۆ قالاسىندا جىلۋ ەلەكتر ستانتسياسىن، كوكشەتاۋ، سەمەي، وسكەمەن قالالارىندا جىلۋ ەلەكتر ورتالىقتارىن سالۋ قاجەت. وسى نىسانداردىڭ بارلىعىنا «تازا كومىر» تەحنولوگياسىن ەنگىزۋ كەرەك. شىندىعىن ايتساق، بۇل جوبالاردىڭ جۇزەگە اسۋى ابدەن سوزىلىپ كەتتى. ەندى ارى قاراي كۇتۋگە بولمايدى»،- دەدى قاسىم-جومارت توقاەۆ.
ايتا كەتەيىك، ەلىمىزدەگى ءۇش قالادا جەو سالۋ جونىندەگى كەلىسىمگە 2024 جىلى قول قويىلعان. قۇجاتتا رەسەي تاراپىنان قازاقستانعا جەڭىلدەتىلگەن ەكسپورتتىق نەسيە بەرۋ كوزدەلگەن بولاتىن. الايدا وتكەن كوكتەمدە ۆيتسە-پرەمەر رومان سكليار بۇل قارجىلاندىرۋدى الۋ ماسەلەسى تۋىنداعانىن مالىمدەدى. ونىڭ ايتۋىنشا، ەگەر رەسەي تاراپى قاراجات بولە الماسا، قازاقستان جاڭا ينۆەستورلار ىزدەۋگە ءماجبۇر بولادى.
شىلدە ايىندا قازاقستان تاراپى كوكشەتاۋداعى جەو قۇرىلىسىن ءوز قارجىسىمەن باستاعانى بەلگىلى بولدى. ال تامىزدا جوباعا قىتايلىق مەردىگەرلەر تارتىلعانى حابارلاندى.
جۋىردا قازاقستاننىڭ ەنەرگەتيكا ءمينيسترى ەرلان اقكەنجەنوۆ نىساندا قازىرگى ۋاقىتتا جەر قازۋ جۇمىستارى جۇرگىزىلىپ، قۇرىلىس الاڭى دايىندالىپ جاتقانىن ايتتى. سونىمەن قاتار ول قازاقستاننىڭ ءالى كۇنگە دەيىن رەسەيدەن سەمەي مەن وسكەمەن قالالارىنداعى قالعان ەكى جەو قۇرىلىسىنا ارنالعان جەڭىلدەتىلگەن نەسيە بويىنشا جاۋاپ الا الماعانىن جەتكىزدى.
