رەسەيدە "ۆاگنەر" جەكە اسكەري كومپانياسىنىڭ باسشىسى ەۆگەني پريگوجين مەن رەسەي قورعانىس ءمينيسترى سەرگەي شويگۋ اراسىنداعى قاقتىعىس اياسىندا رەسەيدەگى اسكەري-ساياسي جاعداي كۇرت ناشارلادى، دەپ حابارلايدى “ادىرنا” ۇلتتىق پورتالى.
23 ماۋسىم كۇنى كەشكە پريگوجين شويگۋدى ۋكرايناعا قارسى سوعىس قيمىلدارىنا قاتىسقان جەكە اسكەري كومپانيانىڭ تىلىنا شابۋىل جاسادى دەپ ايىپتادى. پريگوجيننىڭ مالىمدەمەسىنەن كەيىن فەدەرالدى قاۋىپسىزدىك قىزمەتى قارۋلى توڭكەرىس تۋرالى قىلمىستىق ءىس قوزعادى. رەسەيدىڭ بىرقاتار وبلىستارىندا قاۋىپسىزدىك شارالارى كۇشەيتىلدى.
ەۆگەني پريگوجين رەسەيدىڭ قورعانىس مينيسترلىگى "ۆاگنەر" اسكەرىنە سوققى جاساعانىن مالىمدەگەن. ال ۆۆس قىزمەتىنىڭ مالىمەتىنشە پريگوجين مەن قورعانىس مينيسترلىگى اراسىنداعى داۋ شەگىنە جەتكەن. "ۆاگنەرگە" جاسالعان سوققىدان كەيىن پريگوجين "ادىلدىك مارشىن" وتكىزۋگە ۋادە بەردى. مۇنى كوپشىلىگى اسكەري توڭكەرىس دەپ باعالادى.
الايدا، رەسەي بيلىگى سوققى جاسالعانى تۋرالى اقپاراتتىڭ شىندىققا جاناسپايتىنىن مالىمدەدى.
رەسەي فەدەرالدى قاۋىپسىزدىك قىزمەتىنىڭ تەرگەۋ باسقارماسى 2023 جىلدىڭ 23 ماۋسىمىندا ەۆگەني پريگوجينگە قاتىستى قارۋلى توڭكەرىس دەرەگى بويىنشا قىلمىستىق كودەكستىڭ 279-بابىمەن ءىس قوزعادى. ونىڭ ءىس-ارەكەتىنە لايىقتى قۇقىقتىق باعا بەرىلەدى. بۇل قىلمىس ءۇشىن 12 جىلدان 20 جىلعا دەيىن باس بوستاندىعىنان ايىرۋ جازاسى قاراستىرىلعان، – دەلىنگەن رەسەيدىڭ باس پروكۋراتۋراسىنىڭ مالىمدەمەسىندە.
ودان بولەك، فەدەرالدى قاۋىپسىزدىك قىزمەت پريگوجيننىڭ بۇيرىعىنا باعىنىپ، ورىس حالقىنا قارسى قىلمىس جاساماۋعا جانە قاتەلىك بوي الدىرماۋعا شاقىردى.
رەسەيدىڭ قورعانىس مينيسترلىگى، ىشكى ىستەر مينيسترلىگى مەن فەدەرالدى قىزمەت پۋتينگە تاۋلىك بويى قابىلدانعان شارا بويىنشا بايانداپ وتىرادى. بۇل تۋرالى كرەملدىڭ رەسمي وكىلى دميتري پەسكوۆ حابارلادى.
باق مالىمەتىنشە، دونداعى روستوۆ ايماعىندا بروندالعان تەحنيكا بايقالعان. كەيىن كوشەدەگى كامەرالار ىستەن شىعىپتى. ال "ۆكونتاكتە" مەن ياندەكس پريگوجيننىڭ مالىمدەمەسىن بۇعاتتاي باستاعان.
ايتا كەتەيىك، رەسەيلىك جۋرناليست، نوبەل سىيلىعىنىڭ يەگەرى دميتري مۋراتوۆتىڭ وقيعاعا قاتىستى پىكىرىن جاريالاعان ەدىك. ودان بولەك، قازاقستاننىڭ رەسەيدەگى ەلشىلىگى رەسەيدىڭ ۋكراينامەن شەكارالاس ايماقتارىندا ورىن العان قاۋىپسىزدىك جاعدايلارىنا بايلانىستى بۇل ايماقتارعا بارماۋعا كەڭەس بەرىپ، مالىمدەمە جاسادى.
پريگوجيننىڭ بۇلىگىنە رەسەي پرەزيدەنتى ۆلاديمير پۋتين پىكىر ءبىلدىردى. ول “ۆاگنەر” باسشىسىن ساتقىن دەپ ايىپتاپ, بۇلىكتى باسۋعا بۇيرىق بەردى.
بۇل وتكەن عاسىردىڭ باسىندا بولدى: سودان كەيىن ازامات سوعىسى بولدى، ورىستار ورىستاردى ءولتىردى. بۇنداي جاعدايدىڭ قايتالانۋىنا جول بەرمەيمىز، حالىقتى ىشكى ساتقىندىقتان ساقتايمىز. بۇل – ساتقىندىق. شامادان تىس امبيتسيالار ساتقىندىققا اكەلدى، - دەدى پۋتين ۆيدەوۇندەۋىندە.
بۇل ۇندەۋگە پريگوجين دە ءۇنسىز قالمادى. ول ءپۋتيننىڭ قاتە تاڭداۋ جاساعانىن ايتىپ، تاياۋدا جاڭا پرەزيدەنت كەلەتىنىن دە حابارلادى.
