مەملەكەت باسشىسى ءوڭىردىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزىپ، قوناەۆ قالاسىنداعى ينفراقۇرىلىمنىڭ دامۋ قارقىنىن سىنعا الدى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، جالپى الماتى وبلىسىندا وڭ ەكونوميكالىق ءوسىم بايقالادى. 2025 جىلدىڭ قورىتىندىسى بويىنشا وڭىرلىك جالپى ءونىم كولەمى 6,7 ترلن تەڭگەگە جەتىپ، 5,4 پايىزعا ارتقان. ال بيىلعى قاڭتار-ءساۋىر ايلارىنداعى قىسقا مەرزىمدى ەكونوميكالىق كورسەتكىشتەر بويىنشا وبلىس رەسپۋبليكادا بەسىنشى ورىندا تۇر. مەملەكەت باسشىسى وڭىردە ينۆەستيتسيا تارتۋ جۇمىستارى جالعاسىپ جاتقانىن اتاپ ءوتتى. جىل باسىنان بەرى وبلىس ەكونوميكاسىنا 266,2 ملرد تەڭگە ينۆەستيتسيا قۇيىلىپ، ونەركاسىپ ءوندىرىسىنىڭ كولەمى 900 ملرد تەڭگەگە جۋىقتاعان.
سونىمەن قاتار پرەزيدەنت اۋىل شارۋاشىلىعى سالاسىنداعى كورسەتكىشتەردىڭ تومەن ەكەنىنە نازار اۋداردى.
«بيىلعى ءتورت ايدىڭ قورىتىندىسى بويىنشا اۋىل، ورمان جانە بالىق شارۋاشىلىعىنىڭ ناقتى كولەم يندەكسى 101,2 پايىزدى قۇرادى»، – دەدى قاسىم-جومارت توقاەۆ.
كەڭەس بارىسىندا مەملەكەت باسشىسى وبلىس ورتالىعى قوناەۆ قالاسىنىڭ دامۋ ماسەلەسىنە دە ارنايى توقتالدى. پرەزيدەنت پىكىرىنشە، قالاداعى ينفراقۇرىلىمنىڭ دامۋى جەتكىلىكسىز دەڭگەيدە جۇرگىزىلىپ جاتىر.
«قالا كەلبەتى وزگەرمەگەن، ءبارى بۇرىنعى كۇيىندە قالىپ وتىر. الماتى وبلىسىنىڭ تولىققاندى دامۋى ءۇشىن قوناەۆ قالاسىنا ءبىلىم بەرۋ، اكىمشىلىك، مادەنيەت جانە سپورت نىساندارى سياقتى بازالىق ينفراقۇرىلىم شۇعىل قاجەت. وبلىس باسشىلىعى بۇل وزەكتى ماسەلەگە ەرەكشە نازار اۋدارۋى ءتيىس»، – دەدى پرەزيدەنت.
مەملەكەت باسشىسى ءوڭىر باسشىلىعىنا وبلىس ورتالىعىن دامىتۋ جۇمىستارىن جانداندىرىپ، قاجەتتى الەۋمەتتىك جانە ينجەنەرلىك ينفراقۇرىلىم نىساندارىن سالۋدى جەدەلدەتۋدى تاپسىردى.
