ترامپ اكىمشىلىگى رەسەيگە سالىنعان سانكتسيالىق قىسىمدى ءىشىنارا جەڭىلدەتۋ جوسپارىن ازىرلەمەك. بۇل تۋرالى Reuters اگەنتتىگى جازدى، دەپ حابارلايدى “ادىرنا” ۇلتتىق پورتالى.
اگەنتتىكتىڭ حابارلاۋىنشا، بۇل تاپسىرما اقش مەملەكەتتىك دەپارتامەنتى مەن قارجى مينيسترلىگىنە پرەزيدەنت دونالد ترامپ اكىمشىلىگىنەن تۇسكەن. بۇل ۆەدومستۆولارعا قانداي شەكتەۋ شارالارىن ازايتىپ نەمەسە تولىقتاي الىنىپ تاستالۋى مۇمكىن ەكەندىگى تۋرالى ءتىزىم جاساۋ تاپسىرىلعان.
دايىندالعان ءتىزىم الداعى كەلىسسوزدەر بارىسىندا اقش وكىلدەرى مەن رەسەيلىك شەنەۋنىكتەر اراسىندا تالقىلانباق. اق ءۇي بۇل قادامدى ترامپتىڭ ماسكەۋمەن قارىم-قاتىناستى جاقسارتۋعا جانە ۋكرايناداعى اسكەري قاقتىعىستى توقتاتۋعا ۇمتىلۋىمەن بايلانىستى دەپ ءتۇسىندىردى.
اقپاراتقا سايكەس، قۇجات جوباسىندا بىرقاتار رەسەيلىك زاڭدى جانە جەكە تۇلعالارعا، سونىڭ ىشىندە ءىرى كاسىپكەرلەرگە سالىنعان سانكتسيالاردى الىپ تاستاۋ مۇمكىندىگى قاراستىرىلعان. الايدا تۇپكىلىكتى شەشىم ءالى ناقتى ەمەس.
