رەسەي پرەزيدەنتى ۆلاديمير پۋتين ءتورت جىلدان كەيىن العاش رەت ۇندىستانعا ساپار جاسادى. ۇكىمەتتىك ۇشاق نيۋ-دەليدەگى پالام اسكەري-اۋە بازاسىنا قوندى، دەپ حابارلايدى "ادىرنا".
ۇندىستانعا مەملەكەتتىك ساپارمەن بارعان ءپۋتيندى ۇشاق تراپىنان ءۇندىستان پرەمەر-ءمينيسترى نارەندرا مودي قارسى الدى. سالتاناتتى قارسى الۋ بارىسىندا ءۇندى بيلەرى كورسەتىلدى. وسىدان كەيىن پۋتين مەن مودي ءبىر كولىكپەن بەيرەسمي كەزدەسۋگە جول تارتتى. رەسەي دەلەگاتسياسىنىڭ قۇرامىندا «روسنەفت» باسشىسى يگور سەچين دا بار.
ساپار ەكى كۇنگە سوزىلادى. 4 جەلتوقسان كەشىندە پۋتين موديمەن بەيرەسمي كەزدەسۋ وتكىزىپ، ەرەكشە ارتىقشىلىق بەرىلگەن ستراتەگيالىق ارىپتەستىكتى نىعايتۋ جولدارىن تالقىلادى (ەكىجاقتى قارىم-قاتىناس بۇل دەڭگەيگە 2010 جىلى كوتەرىلگەن). سونىمەن قاتار، Times of India جازعانداي، مودي ءۇندىستاننىڭ ۋكرايناداعى قاقتىعىستىڭ تەزىرەك رەتتەلۋىنە مۇددەلى ەكەنىن راستاۋى كۇتىلەدى.
5 جەلتوقساندا حايداراباد سارايىندا تار جانە كەڭ فورماتتاعى رەسمي كەلىسسوزدەر وتەدى. رەسەي پرەزيدەنتىمەن بىرگە جەتى مينيستر ءجۇر: قورعانىس ءمينيسترى اندرەي بەلوۋسوۆ، قارجى ءمينيسترى انتون سيلۋانوۆ، ەكونوميكالىق دامۋ ءمينيسترى ماكسيم رەشەتنيكوۆ، ءىىم باسشىسى ۆلاديمير كولوكولتسەۆ، اۋىل شارۋاشىلىعى ءمينيسترى وكسانا لۋت، دەنساۋلىق ساقتاۋ ءمينيسترى ميحايل مۋراشكو جانە ورتالىق بانك ءتورايىمى ەلۆيرا نابيۋللينا. دەلەگاتسيا قۇرامىندا «روساتوم» جانە «روسكوسموس» وكىلدەرى دە بار.
پۋتين رەسەي-ءۇندىستان فورۋمىنىڭ پلەنارلىق وتىرىسىنا قاتىسىپ، ءۇندىستان پرەزيدەنتى دراۋپادي مۋرمۋمەن كەزدەسەدى. ساپار قورىتىندىسى بويىنشا ونعا جۋىق ۆەدومستۆوارالىق جانە 15-تەن استام كوممەرتسيالىق كەلىسىمشارتقا قول قويىلاتىنى حابارلاندى. سونىمەن بىرگە 2030 جىلعا دەيىن ەكونوميكالىق ىنتىماقتاستىق باعدارلاماسى قابىلدانادى. رەسەي ءىىم باسشىسى ەڭبەك ميگراتسياسى سالاسىندا ەكى ۇكىمەتارالىق كەلىسىمگە قول قويادى.
ساپار الدىندا ءۇندى تاراپىنان قورعانىس سالاسىن كەڭەيتۋگە قىزىعۋشىلىق بار ەكەنى ايتىلعان. اتاپ ايتقاندا، قوسىمشا بەس پولك س-400 اۋە قورعانىس جۇيەسىن ساتىپ الۋ جانە س-500 «پرومەتەي» كەشەندەرىن جەتكىزۋ مۇمكىندىگى تالقىلانۋدا. كەلىسسوزدەردە ەنەرگەتيكالىق ارىپتەستىك تە نەگىزگى تاقىرىپتاردىڭ ءبىرى بولماق.
2022 جىلدان بەرى ءۇندىستان رەسەي مۇنايىن بىرنەشە ەسە ارتتىرعان. 2025 جىلدىڭ ءبىرىنشى جارتىسىندا رەسەيلىك مۇناي ءۇندىستان يمپورتىنىڭ شامامەن 35%-ىن قۇرادى. الايدا سوڭعى اپتالاردا اقش-تىڭ «لۋكويل» مەن «روسنەفتكە» سانكتسيا ەنگىزۋىنەن كەيىن ءۇندىستان رەسەي مۇنايىن سوڭعى ءۇش جىلداعى ەڭ تومەن دەڭگەيگە دەيىن قىسقارتقان، دەپ حابارلايدى Reuters.
