رەسەي پرەزيدەنتى ۆلاديمير پۋتين ارميانىڭ شتاتتىق سانىن 15,5 مىڭ ادامعا ارتتىرۋ تۋرالى جارلىققا قول قويدى، دەپ حابارلايدى «ادىرنا» ءتىلشىسى currenttime.tv-گە سىلتەمە جاساپ.
ەندى ارميانىڭ جالپى سانى 2 441 630 ادامعا جەتىپ، ونىڭ ىشىندە 1 550 500-ءى اسكەري قىزمەتكەر بولماق.
سوڭعى جەتى اي ىشىندە بۇل ارميانىڭ شتاتتىق سانىن ءتورتىنشى رەت ۇلعايتۋ بولىپ وتىر. بۇعان دەيىنگى وزگەرىستەر ناۋرىز، ماۋسىم جانە شىلدە ايلارىندا قابىلدانعان. جالپى العاندا، سول كەزدە ارميا قاتارىنا 52 500 شتاتتىق بىرلىك قوسىلعان. الدىڭعى جارلىققا سايكەس، 1 تامىزدان باستاپ رەسەي قارۋلى كۇشتەرىنىڭ شتاتتىق سانى 2,43 ميلليون ادامدى، ونىڭ ىشىندە 1,54 ميلليون اسكەري قىزمەتكەردى قۇراۋى ءتيىس ەدى.
رەسەيدىڭ ۋكرايناعا قارسى كەڭ اۋقىمدى سوعىس باستاعانىنان بەرى ۆلاديمير پۋتين ارميا سانىن ۇلعايتۋ تۋرالى جەتىنشى جارلىققا قول قويىپ وتىر. سوعىس باستالعانعا دەيىن رەسەي قارۋلى كۇشتەرىنىڭ قۇرامىندا 1,90 ميلليون ادام، ونىڭ ىشىندە 1,01 ميلليون اسكەري قىزمەتكەر بولعان. سودان بەرى اسكەري قىزمەتكەرلەر سانى 50 پايىزدان استام وسكەن.
Saratoga Foundation قورىنىڭ اعا عىلىمي قىزمەتكەرى پاۆەل لۋزين The Insider باسىلىمىنا بەرگەن سۇحباتىندا بۇل كەڭەيتۋدى «قاعاز جۇزىندەگى وزگەرىس» دەپ اتاپ، ونىڭ ارميادا شىن مانىندە قوسىمشا 15,5 مىڭ اسكەري قىزمەتكەر پايدا بولدى دەگەندى بىلدىرمەيتىنىن ايتتى.
«شتاتتىق بىرلىكتەر، ەڭ الدىمەن، ناقتى ادامداردىڭ بولۋىن ەمەس، قارجىلاندىرۋدى بىلدىرەدى. اسكەريلەر كەيدە قۇرىلىس باتالوندارىن قايتا قۇرۋدى، كەيدە باسقا دا قۇرىلىمداردى اشۋدى جوسپارلايدى. وسىنداي ماقساتتارعا بايلانىستى مىڭداعان جاڭا شتاتتىق ورىن ەنگىزىلەدى»، – دەدى ول.
ساراپشىنىڭ ايتۋىنشا، جاڭا جارلىق «ناقتى ادامدار تۋرالى ەمەس، ۇزاق مەرزىمدى پەرسپەكتيۆاداعى قارجى مەن لاۋازىمدار تۋرالى». ونىڭ پىكىرىنشە، اسكەري قۇرىلىمدار سوعىستىڭ بارىسىنا قاراماستان، ۇزاق ۋاقىتقا جوعارى دەڭگەيدەگى قارجىلاندىرۋدى قامتاماسىز ەتۋگە ۇمتىلادى.
