قازاقستان شەكاراسىن زاڭسىز كەسىپ وتپەك بولعان كەزىندە 41 جاسار رەسەي ازاماتى [ايەل ادام] ۇستالدى. شەكارا بويىندا ۇستالعان ايەلگە ىزدەۋ جاريالانعانىنا التى ايعا جۋىقتاعان، دەپ حابارلايدى “ادىرنا” ۇلتتىق پورتالى.
شىعىس قازاقستان وبلىسى پوليتسياسىنىڭ ءباسپاسوز قىزمەتى رەسەي ازاماتىنىڭ ۇستالعانى تۋرالى حابارلادى. بەلگىلى بولعانداي، ول 2022 جىلدىڭ قىركۇيەگىنەن باستاپ جالداعان پاتەردى توناعان دەگەن ايىپقا بايلانىستى قۇقىق قورعاۋ ورگاندارىنان جاسىرىنىپ كەلگەن.
- كەلتىرىلگەن زالال سوماسى 15 000 رۋبلگە (100 مىڭ تەڭگەگە جۋىق) باعالانادى، - دەپ تولىقتىردى ءباسپاسوز قىزمەتى.
سونداي-اق، ۇستالعان ادام ۋاقىتشا ۇستاۋ يزولياتورىنا قامالدى. پروكۋراتۋرا ورگاندارىمەن بىرلەسىپ قۇرىقتالعان ازاماتتى ەكستراديتسيالاۋ ماسەلەسىن قاراستىرۋ قامىنا كىرىستى.
