قازاقستاندا ەلشى بولعان قاشقاۆي يراندا اقش-قا "توسىن سىي" ازىرلەنگەنىن ايتتى

263
Adyrna.kz Telegram
https://adyrna.kz/storage/uploads/Zt6fy9G4EQHWGYd0h3cWApf9rHUn8NqQQrW0W7s6.jpg

اقش-پەن اراداعى شيەلەنىس كۇشەيگەن تۇستا يران كەز كەلگەن جاڭا شابۋىلعا قىسقا مەرزىمدى نەمەسە شەكتەۋلى جاۋاپ بەرمەيدى. بۇل تۋرالى ەل پارلامەنتىنىڭ ۇلتتىق قاۋىپسىزدىك كوميتەتىنىڭ وكىلى حاسان قاشقاۆي ايتتى، دەپ حابارلايدى «ادىرنا» ءتىلشىسى «انادولۋ» اگەنتتىگىنە سىلتەمە جاساپ.

ونىڭ بۇل مالىمدەمەسىن ەلدىڭ مەملەكەتتىك تەلەارناسى جاريالاعان.

«جاۋ سوعىستى باستايدى، بىراق ونى اياقتايتىن يران بولادى»، – دەدى قاشقاۆي.

ايتۋىنشا، يران قورعانىس جانە شابۋىل جاساۋ الەۋەتىن دامىتۋدا ايتارلىقتاي جەتىستىككە جەتكەن. سونداي-اق قارسىلاستى تەجەۋدىڭ بەلگىلى ءبىر دەڭگەيىنە قول جەتكىزگەن.

قاشقاۆي ءتىپتى قىسقا مەرزىمدى شابۋىلدىڭ ءوزى بىرنەشە كۇنمەن شەكتەلمەيتىن جاۋاپ شارالارىنا اكەلەتىنىن ەسكەرتتى.

«ەگەر قارسىلاس يرانعا قارسى قانداي دا ءبىر ارەكەتكە بارسا، ونى تالاي توسىن سىي كۇتىپ تۇر»، – دەدى پارلامەنت وكىلى.

سونىمەن قاتار ول يران ءوزىن ءالى دە سوعىس جاعدايىندا دەپ سانايتىنىن اتاپ ءوتتى. ال تەگەراننىڭ قارسىلاستارىنا ءوز اۋماعىن پايدالانۋعا مۇمكىندىك بەرەتىن ەلدەر وتەماقى تولەۋگە ءماجبۇر بولاتىنىن ايتتى.

ەسكە سالايىق، اقش بارلاۋ قىزمەتىنىڭ بولجامىنشا، يراننىڭ ارسەنالىندا 1500-دەن 2500-گە دەيىن بالليستيكالىق زىمىران بولۋى مۇمكىن. تەگەران سوعىس قايتا باستالعان جاعدايدا ولاردى تاياۋ شىعىستاعى امەريكالىق اسكەري نىساندارعا سوققى بەرۋ ءۇشىن پايدالانۋى ىقتيمال. بۇل تۋرالى بۇعان دەيىن The Wall Street Journal باسىلىمى ۆاشينگتونداعى دەرەككوزدەرگە سىلتەمە جاساپ حابارلاعان.

گازەت سۇحباتتاستارىنىڭ ايتۋىنشا، بۇل – شامامەن الىنعان كورسەتكىش. سەبەبى يراننىڭ اسكەري ارسەنالىن قالپىنا كەلتىرۋ اۋقىمىن باقىلاۋ قيىندىق تۋعىزىپ وتىر.

حاسان قاشقاۆي - بىرنەشە ەلدە يرانننىڭ ەلشىسى قىزمەتىن اتقارعان بۇرىنعى ديپلومات. ول 1996-2000 جىلدار ارالىعىندى يراننىڭ قازاقستانداعى ەلشىسى بولعان. 

پىكىرلەر