قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير پۋتينگە لاڭكەستىك ارەكەتتەرگە بايلانىستى كوڭىل ايتتى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
«مەملەكەت باسشىسى قاسىم-جومارت توقاەۆ رەسەي پرەزيدەنتى ۆلاديمير پۋتينگە داعىستانداعى پراۆوسلاۆيە شىركەۋلەرى مەن سيناگوگاعا جاسالعان، ءدىني قىزمەتكەرلەر مەن قۇقىق قورعاۋ ورگاندارى وكىلدەرىنىڭ قازاسىنا اكەپ سوقتىرعان لاڭكەستىك ارەكەتتەرگە بايلانىستى شىن جۇرەكتەن كوڭىل ايتتى»، - دەلىنگەن دۇيسەنبى كۇنى حابارلامادا.
مەملەكەت باسشىسى قۇقىق قورعاۋ ورگاندارى ارقىلى جەدەل-ىزدەستىرۋ شارالارىن جۇرگىزۋگە كومەكتەسۋدى ۇسىندى.
پرەزيدەنت اتاپ وتكەندەي، قازاقستان بۇل ادامگەرشىلىككە جاتپايتىن ارەكەتتى قاتاڭ ايىپتايدى جانە بۇۇ، شىۇ جانە باسقا دا بەدەلدى حالىقارالىق ۇيىمدار اياسىندا تەرروريزمگە قارسى كۇرەستە كوپجاقتى ىنتىماقتاستىقتى دامىتۋدى جاقتايدى.
