رەسەي پرەزيدەنتى ۆلاديمير ءپۋتيننىڭ بيلىكتەن ايىرىلىپ، سوعىس ناتيجەسىندە جاۋاپقا تارتىلۋى مۇمكىن دەگەن قورقىنىشى ۋكرايناداعى سوعىستى ودان ءارى ۋشىقتىرۋعا يتەرمەلەۋى ىقتيمال. بۇل تۋرالى The Economist باسىلىمى كرەملگە جاقىن دەرەككوزدەرگە سىلتەمە جاساپ جازدى، دەپ حابارلايدى “ادىرنا”.
باسىلىمنىڭ مالىمەتىنشە، پۋتين ءبىر كەزدەرى ءوزىنىڭ جاقىن سەرىكتەرىنە «ولار مەنى دارعا اسادى» دەگەن. الايدا The Economist بۇل ءسوزدىڭ ناقتى قانداي جاعدايدا ايتىلعانىن كورسەتپەگەن.
كرەملگە جاقىن بىرنەشە دەرەككوزدىڭ ايتۋىنشا، پۋتين بيىل جازدا بىرنەشە اپتا بويى سوعىستىڭ ودان ءارى قالاي جالعاساتىنىن ويلاستىرعان. ناتيجەسىندە رەسەي پرەزيدەنتى سوعىستى جاڭا دەڭگەيدە ۋشىقتىرۋعا باعىت العان بولۋى مۇمكىن.
ءپۋتيننىڭ مۇنداي شەشىمىنە اقش-پەن قارىم-قاتىناستاعى جاعداي دا اسەر ەتۋى ىقتيمال. كرەمل باسشىسىمەن بۇرىننان بايلانىسى بار دەرەككوز The Economist-كە پۋتين اقش ورتالىق بارلاۋ باسقارماسىنىڭ (تسرۋ) ديرەكتورى دجون رەتكليففتىڭ ماسكەۋگە جاقىندا جاساعان ساپارىن ۆاشينگتوننىڭ السىزدىگىنىڭ بەلگىسى رەتىندە قابىلداعانىن ايتقان.
باسىلىم ءپۋتيننىڭ 2021 جىلعى قاراشادا ورتالىق بارلاۋ باسقارماسىنىڭ ديرەكتورى بيلل بەرنستىڭ ماسكەۋگە جاساعان ساپارىنا دا وسىنداي كوزقاراسپەن قاراعانىن جازادى. ول كەزدە بەرنس رەسەي پرەزيدەنتىنە ۋكرايناعا باسىپ كىرمەۋ تۋرالى ەسكەرتۋ ءۇشىن ماسكەۋگە بارعان. الايدا ءۇش ايدان كەيىن رەسەي ۋكرايناعا قارسى تولىق اۋقىمدى سوعىستى باستادى.
The Economist ىقتيمال ەسكالاتسيانىڭ نەگىزگى سەبەپتەرىنىڭ ءبىرى رەتىندە كرەملگە ءتۇسىپ جاتقان ىشكى قىسىمدى اتايدى.
باسىلىمنىڭ باعالاۋىنشا، ەگەر سوعىس رەسەيدىڭ كەم دەگەندە نەگىزگى ماقساتتارىنىڭ ءبىرى — دونباستى تولىق باسىپ الۋمەن اياقتالماسا، بۇل پۋتين ءۇشىن جەڭىلىس رەتىندە قابىلدانۋى مۇمكىن. مۇنداي جاعداي ونىڭ بيلىگىنە، ءتىپتى جەكە باسىنىڭ قاۋىپسىزدىگىنە قاتەر ءتوندىرۋى ىقتيمال.
سونىمەن بىرگە سوعىستى قازىرگى قارقىنمەن جالعاستىرۋ رەسەيدىڭ ەكونوميكالىق رەسۋرستارى مەن ساياسي كاپيتالىن ودان ءارى سارقىپ جاتىر. وسىعان بايلانىستى ەسكالاتسيا پۋتين ءۇشىن سوعىستىڭ بارىسىن وزگەرتۋگە جانە السىزدىك تانىتپاۋعا مۇمكىندىك بەرەتىن قۇرال بولىپ كورىنۋى مۇمكىن.
باسىلىم رەسەيدەگى ىشكى جاعدايدىڭ كۇردەلەنە تۇسكەنىن قوعامدىق كوڭىل-كۇيدەن دە بايقاۋعا بولاتىنىن جازادى.
The Economist كەلتىرگەن «لەۆادا-تسەنتر» ساۋالناماسىنا سايكەس، رەسەيلىكتەردىڭ 57 پايىزى ەلدەگى جاعدايدى «شيەلەنىستى» دەپ باعالاعان. ساۋالناما بارىسىندا سوعىس، ادام شىعىنى، موبيليزاتسيا جانە بولاشاققا دەگەن سەنىمسىزدىك نەگىزگى ماسەلەلەردىڭ قاتارىندا اتالعان.
رەسەي ەليتالارى اراسىنداعى كوڭىل-كۇي بۇدان دا ناشار بولۋى مۇمكىن. باسىلىمعا سۇحبات بەرگەن دەرەككوزدەردىڭ ءبىرى بەس جىلعا جۋىق ۋاقىتقا سوزىلعان سوعىستىڭ ءوزىن رەسەي ءۇشىن ساتسىزدىك دەپ باعالاعان.
رەسەي ناتو-مەن تىكەلەي قاقتىعىسقا بارا ما؟
The Economist رەسەيدىڭ الداعى ۋاقىتتا ۋكرايناعا قولداۋ كورسەتىپ وتىرعان ەلدەرگە قارسى ديۆەرسيالىق جانە گيبريدتى ارەكەتتەردى كۇشەيتۋى مۇمكىن ەكەنىن جوققا شىعارمايدى.
باسىلىمنىڭ بولجامىنشا، ماسكەۋ قارۋ-جاراق جەتكىزىلەتىن باعىتتارعا قىسىم جاساپ، ەۋروپادا اسكەري ءونىم شىعاراتىن كاسىپورىندارعا قارسى ارەكەتتەرگە بارۋى ىقتيمال.
سوعان قاراماستان، باتىس بارلاۋ قىزمەتتەرى ءپۋتيننىڭ ناتو-مەن تىكەلەي اسكەري قاقتىعىسقا ۇمتىلىپ وتىرعانىنا دالەل جوق دەپ ەسەپتەيدى.
The Economist دەرەكتەرىنە سۇيەنگەن بۇل تۇجىرىمدار ازىرگە رەسمي تۇردە راستالعان اقپارات ەمەس. باسىلىم كەلتىرگەن پىكىرلەر ءانونيمدى دەرەككوزدەردىڭ مالىمدەمەلەرىنە نەگىزدەلگەن.
