بۇگىن الماتىداعى م.اۋەزوۆ اتىنداعى ورتالىق كىتاپحانادا ادەبيەت زەرتتەۋشى، فيلولوگيا عىلىمىنىڭ كانديداتى ماماي قانيۇلى احەتوۆتىڭ «قازاقتىڭ شەشەندىك ونەرى» اتتى ءۇش تومدىق كولەمدى عىلىمي ەڭبەگىنىڭ تۇساۋكەسەر ءراسىمى ءوتتى. قازاقتىڭ ءسوز ونەرىنىڭ تەرەڭ تامىرى مەن رۋحاني ارنالارىنا بويلاعان بۇل ەڭبەك – وتاندىق گۋمانيتارلىق عىلىمداعى ەلەۋلى جاڭالىقتاردىڭ ءبىرى بولدى.
سالتاناتتى شارانىڭ شىمىلدىعىن قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ اشىپ، ەڭبەكتىڭ ءمان-ماڭىزىنا كەڭىنەن توقتالدى. ول كىتاپحاناعا مۇحتار اۋەزوۆ ەسىمى بەرىلگەننەن بەرگى العاشقى تۇساۋكەسەردىڭ ءدال وسى زەرتتەۋ ەڭبەگىنە بۇيىرۋىن سيمۆولدىق قۇبىلىس دەپ باعالادى.
– ماماي احەتوۆ – اۋەزوۆ مۇراسىن ۇزاق جىلدار بويى تەرەڭ زەرتتەپ كەلە جاتقان زەردەلى عالىم. ءۇش تومدىق ەڭبەكتە قازاق شەشەندىك ونەرىنىڭ تاريحى، گەنەزيسى، تيپولوگياسى مەن پوەتيكاسى كەشەندى تۇردە قاراستىرىلعان. الەمدىك ريتوريكا مەن قازاق شەشەندىك ءداستۇرىن سالىستىرا وتىرىپ، حالقىمىزدىڭ ءسوز مادەنيەتىنىڭ تەرەڭدىگى مەن تامىرىن اشىپ كورسەتكەن. ءۇش تومدىقتا شەشەندىك ونەردىڭ كونە داۋىردەن بۇگىنگە دەيىنگى ساباقتاستىعى، اناحارسيستەن باستاپ ءابىش كەكىلباەۆ، نۇرلان ورازالينگە دەيىنگى تۇلعالاردىڭ سويلەۋ مادەنيەتى، تەمىربەك جۇرگەنوۆتىڭ ريتوريكالىق شەبەرلىگى، سونداي-اق الەمدىك كوشباسشىلاردىڭ شەشەندىك ۇلگىلەرى تەرەڭ تالدانعان. سوندىقتان بۇل ەڭبەك قازىرگى باسشىلىقتاعى تۇلعالاردىڭ دا، جاس زەرتتەۋشىلەردىڭ دە ۇستەلىندە تۇرۋعا ءتيىس، – دەدى مەرەكە قۇلكەنوۆ.
ول سونداي-اق اتالمىش ءۇش تومدىقتى ء«ال-فارابي اتىنداعى مەملەكەتتىك سىيلىققا» ۇسىنۋ جونىندە ۇسىنىس ءبىلدىردى.
شارا بارىسىندا الماتى قالاسى مادەنيەت باسقارماسىنىڭ باسشىسى دانيار اليەۆ، عالىم، سىنشى، ادەبيەتتانۋشى قانسەيىت ابدەزۇلى، جىرشى ءارى فولكلورتانۋشى بەرىك ءجۇسىپ، «قازاق ادەبيەتى» گازەتىنىڭ باس رەداكتورىنىڭ ورىنباسارى قالي سارسەنباي، جازۋشى جۇسىپبەك قورعاسبەك سىندى زيالى قاۋىم وكىلدەرى ءسوز سويلەپ، ەڭبەكتىڭ عىلىمي جانە رۋحاني ماڭىزىن اتاپ ءوتتى.
كەش سوڭىن جازۋشى قۋاندىق تۇمەنباي قورىتىندىلاپ، ەڭبەكتىڭ ۇلتتىق رۋحانياتقا قوسىلعان زور ۇلەس ەكەنىن اتاپ ءوتتى.
تۇساۋكەسەرگە زيالى قاۋىم وكىلدەرى، اقىن-جازۋشىلار، عالىمدار جانە باق وكىلدەرى قاتىستى.
