28 جەلتوقسان كۇنى الماتى قالاسىندا «جاقىن» اتتى جابىق كەشىنىڭ اياسىندا SANA FOUNDATION پرەزەنتاتسياسى ءوتتى.
اتالمىش قور جوبالارىن، تامىز ايىنىڭ 15جۇلدىزىندا 300 قاتىسۋشى مەن 50-گە تارتا ساراپشىنىڭ باسىن قوسقان، قازاق تىلىندەگى تۇڭعىش بيزنەس فورۋمى نەگىزىندە باستاعان بولاتىن. قازىرگى تاڭدا جوبالار سانىن ارتتىرىپ، ۇزاق مەرزىمدى جۇمىس جاساۋ جوسپارلانىپ وتىر.
جوبا يدەياسىنىڭ اۆتورىنىڭ ءبىرى، بەلگىلى ەكونوميست عالىم ماقسات حالىق العا قويىپ وتىرعان ميسسياعا قول جەتكىزۋ ءۇشىن ماۋسىمدىق فورۋممەن عانا شەكتەلمەۋ كەرەك ەكەندىگىن ايتتى: «وسىعان دەيىن الاش يدەياسىن باسشىلىققا الاتىن جاڭا ەكونوميكالىق مودەل كەرەگىن ايتقان بولاتىنمىن. بىراق قازاق كاسىپكەرلىگىن ءبىر عانا فورۋممەن جاڭا دەڭگەيگە شىعارۋ مۇمكىن ەمەس. ول ءۇشىن تۇراقتى دا جۇيەلى قىزمەت اتقارۋ كەرەك. وسى قور سول ماقساتتا جۇمىس جاساماق».
قور ميسسياسى مەن ماقساتى: اعارتۋشىلىقتى ترەندكە اينالدىرا وتىرىپ، زياتكەر تۇلعالاردى قالىپتاستىرۋ.
شارا كرەاتيۆتى ەكونوميكا وكىلدەرىنەن باستاپ، تۇلعالىق دامۋ اكادەميالارى، مەديتسينالىق جانە سپورت كاسىپكەرلىگىنە دەيىن ايتۋلى جوبا جاساپ جۇرگەن ازاماتتار مەن ازاماتشالار قاتىسقان ينتەللەگەنتسيالاردىڭ باسىن قوستى.
ولاردىڭ قاتارىندا: Kaspi.kz. ءباسپاسوز حاتشىسى، 7kun.kz اقپارات اگەنتتىگىنىڭ قۇرىلتايشىسى ەربول ازانبەك، 91 توبى جانە Yenleak, ميراس جۇگىنىسوۆ برەند مەنەدجەرى ازامات دەمەگەن، «Kex Group» كومپانياسىنىڭ سەرىكتەسى، كاسىپكەر ايگا ، گرەپپلينگ قازاقستان فەدەراتسياسىنىڭ پرەزيدەنتى امانباي يبادۋللا، 7 ءتىل بىلەتىن پوليگلوت، Jetil.kz نەگىزىن قالاۋشى مادي فازل مەن HR مامانى، Centras Insurance Company باسقارۋشى ديرەكتورى ايگۇل قۋاتقىزى، ت.ب. ماماندار بولدى.
تانىستىرىلىمدا كورسەتىلگەندەي SANA FOUNDATION الداعى ۋاقىتتا Sanaly Urpaq, Sana Media, Sana Consulting, Business Workshop جانە Sana Analytics سىندى باسقا دا باعىتتار بويىنشا جۇمىس جاساماق.
"ادىرنا" ۇلتتىق پورتالى
