19 قازان كۇنى الماتى قالاسىنداعى №44 كىتاپحانا بولىمشەسىندە جاس اقىن نۇرساۋلە تولقىننىڭ تىرناقالدى تۋىندىسىنىڭ تۇساۋى كەسىلدى، دەپ حابارلايدى “ادىرنا” ۇلتتىق پورتالى
كىتاپ “توپىراق ءيىسى” دەپ اتالدى. 86 بەتتەن تۇراتىن ەڭبەكتە اقىننىڭ 70-تەن استام ولەڭدەرى جيناقتالعان.
تۇساۋكەسەرگە ەتنوگراف، جازۋشى باياحمەت جۇمابايۇلى، اقىن، ۇستاز مۇرات شايماران، رەجيسسەر تۇردىبەك مايدان، اقىن حاميت ايدار، كىتاپحاناشى داريا نۇرمۇحانبەتوۆا مەن بىرنەشە اقىن زامانداستارى جانە №44 كىتاپحانا بولىمشەسىنىڭ ۇجىمى مەن №205 مەكتەپ وقۋشىلارى، جاقىندارى مەن ارىپتەستەرى قاتىستى.
كەشتى اقىن ءادىل احمەتۇلى تىزگىندەدى. ال تۇساۋىن ەلگە سىيلى جازۋشى، بەلگىلى ەتنوگراف عالىم باياحمەت جۇمابايۇلى كەستى.
نۇرساۋلەنىڭ العاشقى كىتابى كوپتىڭ كوڭىلىنەن شىعىپ، ۇلكەندەردىڭ ىستىق لەبىزىنە يە بولدى. جيىننىڭ شىمىلدىعىن اشقان ەتنوگراف عالىم باياحمەت جۇمابايۇلى باتاسىن بەرىپ، تىلەگىن ايتتى. ال اقىن مۇرات شايماران نۇرساۋلەنىڭ “توپىراق ءيىسى” ەڭبەگىنە پىكىرىن ءبىلدىرىپ، جوعارى باعا بەردى.
“پوەزيانىڭ جۇگى، ول-الەمنىڭ جۇگى، عالامنىڭ جۇگى، ادامنىڭ مۇڭىنىڭ سالماعى. ال ول سالماقتى نۇرساۋلە سەكىلدى تالشىقتاي قىزدىڭ كوتەرىپ كەتۋى ەكى تالاي. بىراق نۇرساۋلە ونى كوتەرە ءبىلدى”،-دەدى اقىن مۇرات شايماران.
كەشتە ىستىق لەبىز دە، تىلەك تە ايتىلدى. ودان بولەك كۇي شەرتىلىپ، قازاقتىڭ اۋەزدى ءانى شىرقالدى. ساعىنىشقا قۇرالعان نۇرساۋلەنىڭ ولەڭدەرىن وقۋشىلار كەزەكپەن وقىدى.
نۇرساۋلە اقىندىقتى بويىنا ءسىڭىرىپ قانا قويماي، انيماتسيا سالاسىن دا مەڭگەرگەن. بۇگىندە بالالارعا ارنالعان وتاندىق بىرنەشە ءمۋلتفيلمنىڭ اۆتورى. سوندىقتان جيىنعا ارىپتەسى ءارى ۇستازى تۇردىبەك مايدان قاتىستى. ول نۇرساۋلەنى جاڭا قىرىنان تانىعانىن جاسىرمادى.
“ۇرپاقتى تاربيەلەۋگە، بالالاردىڭ قازاقي تانىمىن ۇمىتىپ قالماۋىنا ۇلەسىن قوسىپ ءجۇر. مىنە، بۇگىن اقىندىق قىرىن دا بايقاپ وتىرمىن. جازارىڭ كوپ بولسىن. شىعارماشىلىق تابىس تىلەيمىن”،- دەدى رەجيسسەر.
ءىس-شارادا كىتاپحانا قورىنا جاڭا كىتاپ سىيعا تارتىلىپ، قاتىسۋشىلارعا دا تابىستالدى. جيىن سوڭىندا نۇرساۋلە تولقىن جيىلعان قاۋىمعا العىسىن ءبىلدىرىپ، ولەڭىمەن شاشۋىن شاشتى.
ايتا كەتەيىك، نۇرساۋلە تولقىن – اقىن، ستسەناريست. 1995 جىلى 4 قىركۇيەكتە قحر ىلە وبلىسى، نىلقى اۋدانىندا دۇنيەگە كەلگەن. 2013 جىلى اتامەكەنگە تابان تىرەگەن. قوجا احمەت ياساۋي اتىنداعى حقتۋ-دىڭ فيلولوگيا فاكۋلتەتىنىڭ تۇلەگى. ولەڭدەرى بىرنەشە جىر جيناققا ەنگىزىلگەن.
جاس اقىننىڭ العاشقى ەڭبەگى قازاق ادەبيەتىنىڭ ءبىر كىرپىشى بولىپ قالانارى ءسوزسىز. نۇرساۋلەگە شىعارماشىلىق تابىس تىلەپ، جازارىڭ كوپ بولسىن دەيمىز! قالامىڭ ۇشتالا بەرسىن!
“ادىرنا” ۇلتتىق پورتالى
