«Auyl naqyştary» fotobaiqauynyŋ qorytyndysyn şyǧardy, dep habarlaidy "Adyrna" ūlttyq portaly photooner.kz-ke sıltep.
Baiqau Qazaqstannyŋ dästürlerın saqtau, auyl ömırınıŋ oŋ imidjın qalyptastyru jäne fotojurnalistikany qoldau maqsatynda ūiymdastyrylǧan maŋyzdy mädeni joba boldy.
Astanadaǧy «Han Şatyr» sauda oiyn-sauyq ortalyǧynda baiqau jeŋımpazdaryn marapattau räsımı ötıp, üzdık suretter körmesınıŋ aşyluy ūiymdastyryldy. Sondai-aq «Auyl» partiiasy mädeniet jäne aqparat ministrlıgınıŋ qoldauymen jaryq körgen «Auyl naqyştary» atty körkem fotoalbomnyŋ resmi tanystyrylymy da ötkızıldı. Is-şaraǧa partiia basşylyǧy, mädeniet qairatkerlerı, käsıbi fotograftar jäne öner süier qauym qatysty.
«Auyl» partiiasynyŋ töraǧasy Serık Egızbaev baiqaudyŋ el mädenietın saqtaudaǧy rölıne toqtaldy.
«“Auyl naqyştary” – auyl ömırınıŋ sūlulyǧyn, tabiǧaty men eŋbektenıp jürgen adamdardyŋ beinesın paş etetın erekşe joba. Jyl saiyn qatysuşylar sany artyp keledı. Būl – tuǧan jerge degen mahabbat pen qūrmettıŋ körınısı», — dedı ol.
Biyl baiqauǧa Qazaqstannyŋ 20 öŋırınen 678 qatysuşy qatysyp, jalpy 3366 fotosuret ūsynyldy. Jūmystar auyl ömırınıŋ är qyryn, tabiǧattyŋ özındık mınezın, eŋbek adamdarynyŋ beinesı men auyl mädenietın qamtydy. Baiqau «Auyl peizajdary», «Eŋbek adamynyŋ fotoportretı», «Fotoreportaj» nominasiialary boiynşa öttı. Sonymen qatar alǧaş ret «Auyldaǧy baqytty balalyq» atty jaŋa nominasiia engızıldı.
Äleumettık jelı paidalanuşylary dauys beru arqyly taŋdaǧan «Körermender közaiymy» nominasiiasy da erekşe nazarǧa ie boldy. Telegram jelısınde 10 finalistıŋ arasynan üzdık jūmys taŋdaldy.
Jeŋımpazdar sertifikattarmen jäne baǧaly syilyqtarmen marapattaldy. Jalpy jülde qory — 3 mln 900 myŋ teŋge. Bas jüldenı Şymkent qalasynyŋ tūrǧyny — Maqsat Şaǧyrbaev ielendı.
