قر سىرتقى ىستەر ءمينيسترى ەرمەك كوشەرباەۆ رەسمي ساپارمەن كەلگەن يزرايل مەملەكەتىنىڭ سىرتقى ىستەر ءمينيسترى گيدەون ساارمەن كەزدەستى، دەپ حابارلايدى "ادىرنا" ۇلتتىق پورتالى.
كەزدەسۋ بارىسىندا ساياسي ديالوگتىڭ قازىرگى احۋالى، ساۋدا-ەكونوميكالىق جانە ينۆەستيتسيالىق بايلانىستار، تۋريزم، عىلىم، ءبىلىم بەرۋ جانە دەنساۋلىق ساقتاۋ سالاسىنداعى تاجىريبە الماسۋ، تەحنولوگيالىق ترانسفەر ماسەلەلەرى قارالدى.
ساپار اياسىندا ەكى ەلدىڭ سىرتقى ساياسي ۆەدومستۆولارىنىڭ ساياسي كونسۋلتاتسيالارىنىڭ 12-ءشى راۋندى ءوتتى. قازاقستان مەن يزرايل وكىلدەرى حالىقارالىق جانە وڭىرلىك كۇن تارتىبىندەگى ماسەلەلەردى، سونىڭ ىشىندە تاياۋ شىعىستا بەيبىت پروتسەسكە قولداۋ كورسەتۋ جانە سەنىمدى نىعايتۋعا باعىتتالعان باستامالاردى تالقىلادى.
ەرمەك كوشەرباەۆ ەكى ەلدىڭ ديپلوماتيالىق قاتىناستارى 1992 جىلدان بەرى ءوزارا قۇرمەت پەن سەنىمگە نەگىزدەلگەنىن، قازىرگى كەزەڭدەگى سەرىكتەستىكتى جاڭا دەڭگەيگە كوتەرۋگە دايىن ەكەنىن اتاپ ءوتتى. ول ساۋدا، ينۆەستيتسيالىق جانە تەحنولوگيالىق ىنتىماقتاستىقتى، سونىمەن قاتار اگروتەحنولوگيا، تاماق ونەركاسىبى، دەنساۋلىق ساقتاۋ، ينفراقۇرىلىم، ەنەرگيا تيىمدىلىگى جانە جاڭارتىلاتىن ەنەرگيا سالالارىندا بىرلەسكەن جوبالاردى دامىتۋعا قازاقستاننىڭ مۇددەلى ەكەنىن جەتكىزدى.
يزرايل ءسىم باسشىسى ءوز كەزەگىندە ەكونوميكالىق، مادەني جانە گۋمانيتارلىق بايلانىستاردى نىعايتۋعا دايىن ەكەنىن راستادى.
كەلىسسوز قورىتىندىسى بويىنشا ديپلوماتيالىق كادرلاردى دايارلاۋ جانە قوعامدىق ديپلوماتيا سالاسىنداعى ىنتىماقتاستىق تۋرالى مەموراندۋمدار، سونداي-اق ءتۋريزمدى دامىتۋ جانە ۆيزالىق جەڭىلدىكتەر ەنگىزۋ ماسەلەلەرى بويىنشا مەموراندۋمعا قول قويىلدى.
