استانادا قارجىلىق مونيتورينگى اگەنتتىگى (قما) مەن Zakon.kz ينتەرنەت-باسىلىمىنىڭ ۇيىمداستىرۋىمەن تسيفرلىق قاۋىپسىزدىك پەن قارجىلىق الاياقتىقتان قورعانۋ ماسەلەسىنە ارنالعان فورۋم ءوتتى، دەپ حابارلايدى "ادىرنا" ۇلتتىق پورتالى.
ءىس-شارا عىلىم جانە جوعارى ءبىلىم مينيسترلىگى مەن استانا قالاسىنىڭ اكىمدىگىنىڭ قولداۋىمەن "زاڭ جانە ءتارتىپ" تۇجىرىمداماسى اياسىندا ءوتتى.
فورۋمعا مەملەكەتتىك ورگانداردىڭ وكىلدەرى، پارلامەنت دەپۋتاتتارى، قارجى ساراپشىلارى، بلوگەرلەر، جۋرناليستەر جانە ەلوردالىق جوعارى وقۋ ورىندارىنىڭ ستۋدەنتتەرى قاتىستى. سپيكەرلەر ينتەرنەت-الاياقتىقتان قورعانۋ، ديپفەيكتەرگە قارسى ءىس-قيمىل، دەربەس دەرەكتەردى قورعاۋ جانە دروپپەرلىك سحەمالار جايلى كەڭەستەر بەردى.
"قما مەن Zakon.kz بىرلەسىپ حالىق اراسىندا قۇقىقتىق ساۋاتتىلىقتى ارتتىرۋ بويىنشا جۇمىس ىستەيدى. فورۋم بارىسىندا جاستار زاماناۋي گادجەتتەر مەن الەۋمەتتىك جەلىلەردى پايدالانا وتىرىپ تسيفرلىق گيگيەنانى ساقتاۋ جولدارىن ۇيرەنەدى", – دەدى "يۋرينفو" جشس باس ديرەكتورى ميحايل كولومين.
قما-نىڭ پرەۆەنتسيا جانە اناليتيكالىق ازىرلەمەلەر دەپارتامەنتى باسشىسىنىڭ ورىنباسارى اندرەي داۆىدوۆ قازاقستاندا 2025 جىلدىڭ باسىنان بەرى ديپفەيكتەرگە بايلانىستى 40-تان استام قىلمىستىق ءىس تىركەلگەنىن اتاپ ءوتتى. ول ينتەرنەت-الاياقتىقتان قورعانۋ ءۇشىن پايدالانۋشىلارعا كەلەسى كەڭەستەردى بەردى: بەيتانىس ادامدارعا اقشا جىبەرمەۋ، شۇعىل وتىنىشتەرگە اسىقپاۋ، فوتوسۋرەتتەر مەن ۆيدەولاردى سەنىمسىز تۇلعالارعا جولداماۋ، داۋىستىق حابارلامالارعا ساقتىقپەن قاراۋ.
ساراپشىلار تسيفرلىق گيگيەنا نەگىزدەرىن ساقتاۋ ارقىلى قازاقستاندىقتاردى جاھاندىق جەلىنىڭ سەنىمدى پايدالانۋشىلارى بولۋعا شاقىردى. سونىمەن قاتار، جاساندى ينتەللەكت نەگىزىندەگى قما-نىڭ Ai-وفيتسەرى مەن PRG.Komek اي-قىزمەتى قاتىسۋشىلارعا سۇراقتارىنا ناقتى جاۋاپ بەرىپ، قۇقىقتىق ماسەلەلەر بويىنشا كەڭەس بەردى.
فورۋم بارىسىندا قاتىسۋشىلار قارجىلىق الاياقتىقتىڭ جاڭا تۇرلەرى، ونىڭ ىشىندە ديپفەيكتەر مەن دروپپەرلىك سحەمالار تۋرالى اقپارات الىپ، تسيفرلىق قاۋىپسىزدىك پەن جاۋاپكەرشىلىكتى ساقتاۋ جولدارىن ۇيرەندى.
