استانادا دوسمۇحامەدۇلى كوشەسىنىڭ بويىندا (اقجول كوشەسىنەن الاش داڭعىلىنا دەيىن) ۇزىندىعى 3 شاقىرىم بولاتىن تەحنيكالىق سۋ قۇبىرى قايتا جاڭارتىلىپ جاتىر. بۇل جەلىنىڭ جۇمىس ىستەپ تۇرعانىنا 20 جىلدان اسقان، ال قۇبىرلار مەن جابدىقتاردىڭ توزۋ دەڭگەيى 100%-عا جەتكەن. وسى ماگيسترال ارقىلى 80 كاسىپورىن، سونىڭ ىشىندە جەو-1, «استانا-تازالىق» جانە باسقا دا ءىرى ونەركاسىپ ورىندارى تەحنيكالىق سۋ الىپ وتىر.
تۇتىنۋشىلار مەن جاڭا ءوندىرىس نىساندارى كوبەيگەندىكتەن، قولدانىستاعى جەلى قاجەتتى سۋ كولەمىن قامتاماسىز ەتە الماي قالدى. جوبانىڭ قۇنى – 2,38 ميلليارد تەڭگە. قازىرگى ۋاقىتتا جۇمىستىڭ 55%-عا جۋىعى اياقتالدى، جوسپارلانعان 3 شاقىرىمنىڭ 1,7 شاقىرىمىنا جاڭا قۇبىرلار توسەلدى.
قانداي جۇمىس اتقارىلدى؟
جاڭا سۋ قۇبىرىنىڭ ءبىر شاقىرىمنان استام بولىگى جولدى تولىق قازباي-اق، جەر استىمەن جۇرگىزىلدى. بۇل ءادىس ماڭايدى بۇلدىرمەي، تۇرعىندار مەن جۇرگىزۋشىلەرگە قولايسىزدىق تۋدىرماۋعا مۇمكىندىك بەردى. تاعى 600 مەترگە جۋىق قۇبىر اشىق ادىسپەن توسەلدى. سونداي-اق، نىساندا سۋ بەرۋدى رەتتەۋگە ارنالعان بەس جاڭا قۇدىق پەن جابدىقتار ورناتىلدى.
جوبا بويىنشا بارلىعى 22 قۇدىق پەن 10 تەحنيكالىق كامەرا سالۋ قاراستىرىلعان. قازىر مەردىگەر جۇمىستى ءارى قاراي جالعاستىرىپ، ۇزىندىعى 232 مەتر بولاتىن كەلەسى ۋچاسكەنى دايىنداپ جاتىر.
نەلىكتەن سۋ قۇبىرىن اۋىستىرۋ قاجەت؟
قولدانىستاعى سۋ قۇبىرىنىڭ پايدالانىلىپ كەلە جاتقانىنا 20 جىلدان اسقان جانە ول ءوز قولدانۋ مەرزىمىن تولىق وتەدى. قۇبىرلار مەن جابدىقتاردىڭ 100%-عا توزۋى سۋدىڭ اعۋى، اقاۋلاردىڭ پايدا بولۋى جانە تەحنيكالىق سۋ بەرۋدەگى ىركىلىستەر قاۋپىن ارتتىرادى.
وسى ۋاقىت ىشىندە استانا ودان ءارى ءوسىپ كەلەدى. قالادا جاڭا ءوندىرىس ورىندارى پايدا بولىپ، تۇتىنۋشىلار سانى مەن كوممۋنالدىق جەلىلەرگە تۇسەتىن سالماق ارتىپ كەلەدى.
جاڭا سۋ قۇبىرى سۋدى كوبىرەك وتكىزە الادى جانە 80 ۇيىم مەن كاسىپورىندى تۇراقتى تۇردە تەحنيكالىق سۋمەن قامتاماسىز ەتەدى.
جەلىلەر «اقىلدى» باقىلاۋعا قالاي كوشىرىلەدى؟
سونىمەن قاتار استانادا قۇنى 916,4 ملن تەڭگە بولاتىن سۋمەن قامتۋ جانە سۋ بۇرۋ جۇيەسىن باسقارۋدىڭ تسيفرلىق جۇيەسى دايىندالىپ جاتىر. ول سورعى ستانتسيالارىن، جەلىلەردىڭ ەلەكتروندى كارتالارىن، سۋدىڭ قىسىمى مەن شىعىنى تۋرالى مالىمەتتەردى، ديسپەتچەرلىك قىزمەتتەردى، ارنايى تەحنيكانىڭ GPS-مونيتورينگىن جانە جوندەۋ بريگادالارىنىڭ ءموبيلدى قوسىمشالارىن ءبىر ارناعا بىرىكتىرەدى.
ەگەر قايسىبىر ۋچاسكەدە سۋدىڭ قىسىمى نەمەسە شىعىنى وزگەرسە، ديسپەتچەر اۋىتقۋدى ەكراننان كورىپ، زاقىمدالۋى مۇمكىن ورىندى انىقتايدى دا، ول جەرگە ەڭ جاقىن ورنالاسقان بريگادانى جىبەرەدى.
2026 جىلى جوبالىق قۇجاتتامانى دايىنداۋعا 92,8 ملن تەڭگە قاراستىرىلعان. قۇنى 823,6 ملن تەڭگە بولاتىن نەگىزگى جۇمىستار 2027 جىلعا جوسپارلانعان. جوبانى 2027 جىلدىڭ سوڭىنا دەيىن اياقتاۋ كوزدەلىپ وتىر.
بۇل شارالاردان قالاعا نە پايدا؟
2025 جىلى استانا جەلىلەرىندەگى سۋدىڭ ناقتى ىسىرابى 21% بولدى. تسيفرلىق باقىلاۋ سۋدىڭ اعۋى مەن اقاۋلاردى جىلدام تابۋعا، ماسەلەسى بار ۋچاسكەلەردى دالىرەك انىقتاۋعا جانە اپاتتاردى تەز ارادا جويۋعا مۇمكىندىك بەرەدى.
جۇيە تەك سۋ قۇبىرلارىن عانا ەمەس، كارىز جەلىلەرىن دە قامتيدى. بۇل كەپتەلىستەر مەن سۋدىڭ تاسۋىن ەرتەرەك انىقتاپ، جولدار مەن قالا اۋماقتارىندا سۋ باسۋ قاۋپىن ازايتادى.
2029 جىلعا دەيىن استانادا جالپى قۇنى 12,04 ملرد تەڭگە بولاتىن سۋمەن قامتۋ جانە سۋ بۇرۋ جەلىلەرىن سالۋ مەن قايتا جاڭارتۋ بويىنشا توعىز جوبانى جۇزەگە اسىرۋ جوسپارلانعان.
ناتيجەسىندە ەلوردا ابدەن توزعان سۋ قۇبىرىنىڭ ورنىنا جاڭا ماگيسترالعا يە بولادى، ال كوممۋنالدىق قىزمەتتەر جەلىلەردىڭ جاعدايىن ونلاين قاداعالاپ، اقاۋلاردى الدەقايدا جىلدام جويا الادى.
