استانادا ءۇش جاسار قىزدىڭ جەكە ستوماتولوگيادا قايتىس بولۋىنا بايلانىستى ءىس بويىنشا سوت پروتسەسى جالعاسىپ جاتىر، دەپ حابارلايدى "ادىرنا" ۇلتتىق پورتالى Tengrinews-قا سىلتەپ.
باق بەتتەرىندە استاناداعى كلينيكالاردىڭ بىرىندە دارىگەر كىشكەنتاي قىزدىڭ 18 ءتىسىن بىردەن ەمدەمەك بولعانى تۋرالى اقپارات تاراعان. وقيعا 2024 جىلدىڭ 30 قازانىندا بولدى.
مارقۇمنىڭ اكەسى قىزى ناركوزدان كەيىن ويانباعان، ال پروتسەدۋرا 3 ساعاتقا جوسپارلانعان بولسا دا، 3,5 ساعاتقا سوزىلعانىن ايتادى. الدىڭعى وتىرىستاردا اكەسى دارىگەرلەر 18 ءتىستى بىردەن ەمدەگەنىن، ونى بىرنەشە كەزەڭگە بولمەگەنىن ايتقان.
ءىس بويىنشا تەك انەستەزيولوگ جاۋاپقا تارتىلۋدا. ستوماتولوگ سوتقا قاتىسپاعان. ءىس قر قك 317-بابىنىڭ 3-ءبولىمى («مەديتسينالىق قىزمەتكەردىڭ كاسىبي مىندەتتەرىن دۇرىس ورىنداماۋى، ناتيجەسىندە ادامنىڭ ولىمىنە اكەپ سوعۋى») بويىنشا قارالۋدا. انەستەزيولوگقا ءتورت جىلعا دەيىن قاماۋ نەمەسە شەكتەۋ، سونداي-اق ءۇش جىلعا دەيىن بەلگىلى ءبىر قىزمەت تۇرلەرىن اتقارۋعا تىيىم سالۋ تۇرىندەگى جازالار قولدانىلۋى مۇمكىن.
2025 جىلعى 25 قاراشادا پروكۋرور مەديتسينالىق جانە فارماتسەۆتيكالىق باقىلاۋ كوميتەتىنىڭ ساراپتاما ناتيجەلەرىن وقىدى. ساراپشىلار مەديتسينالىق قۇجاتتامادا بۇزۋشىلىقتار انىقتاعان. ستوماتولوگيالىق كارتا بولماعان، ناۋقاس كەلىسىمى دۇرىس راسىمدەلمەگەن، كەڭەستەر جازىلماعان.
سونىمەن قاتار، ۆيدەوماتەريالدارمەن سايكەسسىزدىك، دياگنوزداردىڭ ناۋقاستىڭ جاعدايىن كورسەتپەۋى، قولدانىلعان كەيبىر پرەپاراتتاردىڭ قۇجاتتا بولماۋى تىركەلگەن.
پروكۋروردىڭ ايتۋىنشا، «كەتوتيفەن، سۋپراستين جانە كالتسي» پرەپاراتتارى قولدانىلعان، بىراق قۇجاتتاردا كورسەتىلمەگەن.
ناركوز كەزىندە كاپنوگرافيا ولشەنبەگەن، جۇرەك-وكپە رەانيماتسياسى حاتتاماسى جاسالماعان، قان قىسىمى باقىلانباعان. بالانىڭ جاعدايى ناشارلاعان كەزدە انەستەزيولوگ ناركوزدى تەرەڭدەتكەن، كارديومونيتورينگ جۇرگىزىلمەگەن، ادرەنالين دوزاسى جاسقا سايكەس كەلمەگەن.
ساراپتاما قورىتىندىسىنا سايكەس، بالانىڭ ءولىمى گيپوكسيادان (وتتەكسىزدىكتەن) بولعان، بۇل مي ىسىگىنە الىپ كەلگەن. ساراپشىلاردىڭ ايتۋىنشا، بۇل جاعداي مەديتسينالىق سەداياتسيا مەن جاساندى تىنىس الۋ، قوس قاباتتى پنەۆمونيا جانە جۇرەك-قان تامىر جەتكىلىكسىزدىگى سالدارىنان تۋىنداعان.
سوت پروتسەسى ءالى جالعاسۋدا.
