استانا قالاسىنىڭ اكىمى جەڭىس قاسىمبەك Instagram پاراقشاسىندا ستۋدەنتتەر جاتاقحاناسىنىڭ ماسەلەسى قالاي شەشىلىپ جاتقانى تۋرالى جازدى، دەپ حابارلايدى ەلوردا اكىمدىگىنىڭ رەسمي سايتى.
«وقۋ جىلىنىڭ باستالۋىنا ەكى اپتانىڭ كولەمىندەي عانا ۋاقىت قالدى. الەۋمەتتىك نىسانداردى اشۋعا دايىنداپ وتىرمىز. وزدەرىڭىز بىلەتىندەي، وزگە قالالاردان كەلەتىن ستۋدەنتتەردىڭ سانى جىل سايىن ارتىپ كەلەدى. سالالىق مينيسترلىكپەن، ۋنيۆەرسيتەتتەرمەن جانە ينۆەستورلارمەن بىرلەسە وتىرىپ، جاتاقحانا ورىندارىن كوبەيتۋ باعىتىندا جۇمىس ىستەپ جاتىرمىز.
عىلىم جانە جوعارى ءبىلىم ءمينيسترى ساياسات نۇربەكپەن بىرگە جاڭا وقۋ جىلى قارساڭىندا اشىلاتىن 400 ورىندىق ستۋدەنتتىك جاتاقحاناعا (ا.پۋشكين كوشەسى، 13ا) باردىق. اتالمىش الەۋمەتتىك نىسان جەكە ينۆەستيتسيا ەسەبىنەن سالىندى.
ەلوردادا 2025 جىلدىڭ باسىنان بەرى شامامەن 2 مىڭ 700 ورىندىق جاتاقحانا پايدالانۋعا بەرىلدى. جىل سوڭىنا دەيىن 2 060 ورىنعا ارنالعان تاعى 7 نىساندى اشۋ جوسپارلانىپ وتىر.
وسىلايشا، 2025 جىلى جالپى سىيىمدىلىعى 4 716 ورىندىق 8 ستۋدەنتتىك جاتاقحانا پايدالانۋعا بەرىلەدى.
وتكەن جىلى ەلوردادا جالپى سىيىمدىلىعى شامامەن 1 700 ورىنعا ارنالعان 5 ستۋدەنتتىك جاتاقحانا پايدالانۋعا بەرىلدى.
سونىمەن قاتار، جاڭا وقۋ جىلى ىشىندە 15 مەكتەپ اشامىز، ونىڭ 7-ەۋى «جايلى مەكتەپ» ۇلتتىق جوباسى اياسىندا سالىنادى. بۇل ءبىلىم بەرۋ نىساندارى ەكى اۋىسىمدا 28 مىڭ وقۋشى ورنىن اشۋعا مۇمكىندىك بەرەدى. سول سياقتى ەلوردادا بالاباقشالار، وقۋشىلار سارايى جانە باسقا دا الەۋمەتتىك نىساندار سالىنىپ جاتىر»، – دەپ جازدى جەڭىس قاسىمبەك.
