فوتو جي كومەگىمەن جاسالدى
استانا قالاسىنىڭ مەملەكەتتىك كىرىستەر دەپارتامەنتىنە قاراستى «اۋەجاي – استانا» كەدەن بەكەتىنىڭ قىزمەتكەرلەرى ءموبيلدى قۇرىلعىلاردى زاڭسىز اكەلۋدىڭ 10 دەرەگىن انىقتادى، دەپ حابارلايدى "ادىرنا" ءتىلشىسى.
ناتيجەسىندە 223 iPhone 18 سمارتفونى مەن 10 جۇپ AirPods سىمسىز قۇلاققابى تاركىلەندى. بۇل تۋرالى مەملەكەتتىك كىرىستەر كوميتەتى حابارلادى.
مالىمەتكە سايكەس، جولاۋشىلار ۇيالى تەلەفونداردى باگاج ارقىلى «جاسىل دالىزبەن» وتكىزبەك بولعان. ياعني تاۋارلارعا كەدەندىك دەكلاراتسيا ۇسىنباعان.
تەكسەرۋ بارىسىندا ءبىر جولاۋشىنىڭ باگاجىنان بىردەن 50 سمارتفون تابىلعان. بۇل جەكە تۇلعانىڭ جەكە پايدالانۋعا ارنالعان تاۋار رەتىندە باج تولەمەي جانە دەكلاراتسياسىز الىپ وتۋگە رۇقسات ەتىلگەن مولشەردەن ايتارلىقتاي كوپ.
مەملەكەتتىك كىرىستەر دەپارتامەنتىنىڭ مالىمەتىنشە، انىقتالعان جاعدايلارعا قاتىسى بار ءتورت ادامنىڭ جەكە كاسىپكەر مارتەبەسى بولعان. تاعى ءتورت ازامات سمارتفونداردى جەكە كاسىپكەر رەتىندە تىركەلمەي اكەلگەن.
مەملەكەتتىك كىرىستەر دەپارتامەنتى كەدەن شەكاراسى ارقىلى تاۋار وتكىزگەن كەزدە ولاردىڭ جەكە پايدالانۋعا ارنالعان تاۋارلارعا قويىلاتىن زاڭ تالاپتارىنا سايكەستىگىن ەسكەرۋ قاجەت ەكەنىن ەسكەرتتى.
قولدانىستاعى تالاپتارعا سايكەس، ءبىر ادام كەدەن شەكاراسى ارقىلى ەكى سمارتفوننان ارتىق الىپ وتە المايدى. تاۋاردىڭ سانى نەمەسە سيپاتى جەكە پايدالانۋعا ارنالعان تاۋارلار ولشەمدەرىنە سايكەس كەلمەسە، ولار كەدەندىك دەكلاراتسيالاۋعا جانە ءتيىستى كەدەندىك راسىمدەۋگە جاتادى.
تاركىلەنگەن سمارتفوندار ۋاقىتشا ساقتاۋ قويماسىنا ورنالاستىرىلدى. تاۋار يەلەرىن اكىمشىلىك جاۋاپكەرشىلىككە تارتۋ جوسپارلانىپ وتىر.
