22–24 ساۋىردە استانادا ايماقتىق ەكولوگيالىق سامميت اياسىندا كاسپي تەڭىزىنىڭ دەڭگەيىنىڭ تومەندەۋ سەبەپتەرىن زەرتتەيتىن بىرلەسكەن جۇمىس توبىنىڭ العاشقى وتىرىسى ۇيىمداستىرىلادى، دەپ حابارلايدى “ادىرنا”.
باكۋدەگى قازاقستان ەلشىلىگىنىڭ باسشىسى اليم بايەل مەن ازەربايجان پرەزيدەنتىنىڭ كليمات ماسەلەلەرى جونىندەگى وكىلى مۇحتار باباەۆ كەزدەسىپ، كاسپي تەڭىزىنىڭ ەكولوگيالىق جاعدايىن جاقسارتۋ ماسەلەلەرىن تالقىلاعان.
كەزدەسۋ بارىسىندا ازەربايجان قازاقستان پرەزيدەنتى قاسىم-جومارت توقاەۆتىڭ بۇۇ جۇيەسى اياسىندا حالىقارالىق سۋ ۇيىمىن قۇرۋ باستاماسىن قولدايتىنى اتاپ ءوتىلدى.
مۇحتار باباەۆ ازەربايجاننىڭ باستامانى تولىق قولدايتىنىن، بۇل ۇيىمنىڭ قۇرىلۋى سۋ رەسۋرستارىن باسقارۋداعى قازىرگى پروبلەمالاردى شەشۋدە وزەكتى ەكەنىن جەتكىزدى. ول اتاپ وتكەندەي، سۋ ماسەلەلەرى تەك ەكولوگيالىق سيپاتقا يە ەمەس، سونىمەن قاتار قاۋىپسىزدىك پەن ەكونوميكاعا دا تىكەلەي اسەر ەتەدى، سوندىقتان ولاردى جۇيەلى تۇردە شەشۋ ماڭىزدى.
كەزدەسۋ بارىسىندا تاراپتار ەكولوگيالىق كۇن ءتارتىبى، كاسپي تەڭىزىنىڭ ەكوجۇيەسىن ساقتاۋ، الداعى بىرلەسكەن ءىس-شارالارعا دايىندىق جانە حالىقارالىق تابيعاتتى قورعاۋ باستامالارىن قولداۋ ماسەلەلەرىن تالقىلادى.
سونىمەن قاتار، قازاقستان ەلشىسى ازەربايجان تاراپىن ايماقتىق ەكولوگيالىق سامميتكە بەلسەندى قاتىسۋعا شاقىردى. سامميت بارىسىندا بىرلەسكەن جۇمىس توبىنىڭ العاشقى وتىرىسى وتكىزىلىپ، كاسپي تەڭىزىنىڭ دەڭگەيىن تومەندەتۋ سەبەپتەرى جان-جاقتى قارالادى دەپ جوسپارلانۋدا.
