ءانشى ءارى اكتريسا نورا نۇعمان قاتەرلى ىسىككە شالدىققانىن مالىمدەدى، دەپ حابارلايدى "ادىرنا" ۇلتتىق پورتالى.
نورا (نۇرگۇل نۇعمانوۆا) ەسىمىمەن تانىمال ءانشى، اكتريسا جانە پروديۋسەر قاتەرلى ىسىككە شالدىققان. ول دەنساۋلىعى تۋرالى تيمۋر بالىمبەتوۆكە بەرگەن سۇحباتىندا ايتتى.
ونەر يەسىنىڭ سوزىنشە، ەكى جىل بۇرىن ومىراۋىندا ءتۇيىن پايدا بولىپ، تەكسەرۋ ناتيجەسىندە ونىڭ قاتەرلى ىسىك ەكەنى انىقتالعان.
«43 جىل بويى بىردە-ءبىر رەت تەكسەرىلمەپپىن. ومىراۋىمدا ءتۇيىن شىققان سوڭ اۋرۋحاناعا باردىم، دارىگەرلەر ونىڭ قاتەرلى ىسىك ەكەنىن ايتتى. بارلىق ءاناليزدى تاپسىردىم، دياگنوز راستالدى. بىراق مەن ونى فيبروادەنوما دەپ ويلايمىن، ويتكەنى دارىگەرلەرگە سەنۋدەن قالدىم»، – دەدى ءانشى.
العاشقى كەزەڭدە ول دارىگەرلەر ۇسىنعان ەمدى قابىلداپ، حيميوتەراپيادان وتكەن. ونىڭ ايتۋىنشا، سول ۋاقىتتا اۋرۋدىڭ بەتىن قايتارعان. الايدا نورا نۇعماندا اۋرۋ قايتا اسقىنعان.
ءانشى قاتەرلى ىسىككە قارسى ەم قابىلداۋدان باس تارتقانىن دا جاسىرمادى.
«اۋرۋحانادا جاتقىم كەلمەيدى، قايتادان حيميا قابىلداعىم كەلمەيدى. بۇرىن ەمدەلسەم، جازىلامىن دەپ سەندىم. بىراق رەتسيديۆتى ەستىگەننەن كەيىن شەشىم قابىلدادىم – ەمدەلگىم كەلمەيدى. مەن بۇل ۋاقىتتى اۋرۋمەن ارپالىسۋعا ەمەس، ءومىر سۇرۋگە ارناعىم كەلەدى»، – دەدى ونەر يەسى.
