زاڭگەر نۇرسۇلتان ورىنبەكوۆ ەسىرتكىگە ماس كۇيىندە كولىك جۇرگىزىپ ۇستالعان ءانشى قاراكەسەكتىڭ شىعارماشىلىعىنا تىيىم سالۋدى ۇسىندى، دەپ حابارلايدى “ادىرنا” ۇلتتىق پورتالى.
«جاقىندا اقتوبەدە قاراكەسەك دەگەن ءانشى ۇستالدى. ونىڭ قىلمىستىق ءىسى اكىمشىلىك ىسكە اۋىسىپ كەتتى. بىراق وسىنداي تۇلعالاردى ساحنالاردان، ەفيرلەردەن، پلاتفورمالاردان الىپ تاستاۋ كەرەك. ونىڭ اندەرى جاستار اراسىندا كەڭ تاراعان. «اپپاعىم، سەنەن ارتىعىن تاپپادىم» دەيدى. بىلاي قاراساڭ، ماحاببات تۋرالى ءان سياقتى. بىراق ول مەفەدرون، اق ۇنتاققا قاتىستى ءان دەگەن قاۋەسەت بار. ەسىرتكىنى استارلاپ ناسيحاتتاپ ءجۇر. مادەنيەت مينيسترلىگى وسىنداي انشىلەردىڭ اندەرىن ساحنادان الىپ تاستاي الا ما؟»، – دەدى زاڭگەر.
بۇل ساۋالعا مادەنيەت جانە اقپارات ۆيتسە-ءمينيسترى ەۆگەني كوچەتوۆ جاۋاپ بەردى. ونىڭ ايتۋىنشا، جاستار اراسىندا ەسىرتكىنى رومانتيزاتسيالاۋ دەرەكتەرى كەزدەسەدى.
«قاراكەسەكتىڭ جاعدايىنا كەلسەك، ماعان دا كوپ ادام «اندەرىن ماس كۇيىندە جازعان شىعار» دەپ ايتتى. بۇل ءار ادامنىڭ قيالى بولۋى مۇمكىن. بىراق، ەكىنشى جاعىنان، ءبىز بۇل جاعىنان قالاي ساقتانا الامىز؟ مۇندايعا قاتىسى بار ارتىستەردى قاداعالاپ وتىرامىز. بىراق ولاردى قوعامنىڭ ءوزى دە شەتتەتۋى كەرەك. ونى رومانتيزاتسيالايتىن قوعامنىڭ ءوزى. مىسالى، «شەكەر» سەريالىنان كەيىن دە قوعامنىڭ پىكىرى ەكىگە جارىلىپ كەتكەن بولاتىن»، – دەدى ول.
ەسكە سالا كەتەيىك، بۇعان دەيىن ءانشى ەسىرتكىگە ماس كۇيىندە كولىك ايداپ ۇستالعان ەدى
