12 قاراشادا مەملەكەت باسشىسى قاسىم-جومارت توقاەۆتىڭ رەسەيگە ساپارىنىڭ قۇرمەتىنە پرەزيدەنت ۆلاديمير ءپۋتيننىڭ اتىنان كرەملدە مەملەكەتتىك قابىلداۋ ءوتتى، دەپ حابارلايدى «ادىرنا» ءتىلشىىسى.
قاسىم-جومارت توقاەۆ ءبىزدىڭ ورتاق تاريحىمىز بىرلىكتىڭ ۇلگىسىن تانىتاتىن سوزدەردىڭ قاي-قايسىسىنان دا ارتىق ەكەنىنە توقتالدى.
«قيىن جىلداردا ءبىز ءبىر-ءبىرىمىزدى قولداپ، يىق تىرەسىپ قاتار تۇردىق. بىرگە تالاي قيىندىقتى جەڭدىك، بۇگىندە جادىمىزدا ساقتاپ، جۇرەگىمىزدىڭ تورىندە قاستەرلەپ ۇستايتىن ۇلى جەڭىسكە بىرلەسىپ جەتتىك. اتا-بابامىزدان «قۇداي قوسقان كورشى» دەگەن ءسوز قالعان. رەسەي – قازاقستاننىڭ قۇداي قوسقان كورشىسى»،- دەدى ول.
كەيىن ەكى ەل پرەزيدەنتى قازاقستان ونەرپازدارىنىڭ گالا-كونتسەرتىنە باردى.
قازاقستاننىڭ رەسەيدەگى مادەنيەت كۇندەرى اياسىندا ۇيىمداستىرىلعان مەرەكەلىك كەش ۇلكەن تەاتردا ءوتتى.
ساحنادا روزا رىمباەۆا، ماريا مۋدرياك، رەنات عايسين، الىشەر كارىموۆ، الەكساندر بەلياكوۆ جانە زارينا التىنباەۆا سەكىلدى تانىمال انشىلەر ونەر كورسەتتى. ءىس-شارادان سوڭ مەملەكەتتەر باسشىلارى ساحنا شەبەرلەرىمەن اڭگىمەلەسىپ، العىس ايتتى.
وسىلايشا قازاقستان پرەزيدەنتىنىڭ رەسەي فەدەراتسياسىنا مەملەكەتتىك ساپارى اياقتالدى.ۆنۋكوۆو اۋەجايىندا پرەزيدەنت قاسىم جومارت توقاەۆتى رەسەي ۇكىمەتى توراعاسىنىڭ ورىنباسارى الەكسەي وۆەرچۋك پەن باسقا دا رەسمي تۇلعالار شىعارىپ سالدى. رەسەي بيلىگىندە وۆەرچۋك ەۋرازيا كەڭىستىگىندەگى ىقپالداستىق، G20, بريكس، شىۇ-مەن بايلانىسقا جاۋاپ بەرەدى. پرەزيدەنت قاسىم-جومارت توقاەۆ وسى مەملەكەتتىك ساپارىمەن ماسكەۋگە بارعاندا رەسەي ۇكىمەتىنىڭ ءبىرىنشى ورىنباسارى دەنيس مانتۋروۆ جانە باسقا دا رەسمي تۇلعالار قارسى العان بولاتىن.
