رەسەي پرەزيدەنتى ۆلاديمير پۋتين جىلدىق ەسەپ بەرۋ كەزىندە ەڭبەك ميگرانتتارى تۋرالى پىكىرىن ءبىلدىرىپ، بۇل ماسەلەگە جۇيەلى تۇردە قاراۋ كەرەكتىگىن اتاپ ءوتتى، دەپ حابارلايدى “ادىرنا” ۇلتتىق پورتالى.
ول ءبىر جاعىنان بىلىكتىلىگى جوق جۇمىستارعا قاجەتتىلىكتى ازايتۋ كەرەك ەكەنىن ايتسا، ەكىنشى جاعىنان، رەسەيگە جۇمىس ىزدەپ كەلگەن ميگرانتتاردى الدىن الا دايىنداۋ ماڭىزدى ەكەنىن مالىمدەدى.
"ورتالىق ازيا ەلدەرىندە ورىس مەكتەپتەرىنىڭ جەلىسىن اشىپ، بولاشاق ميگرانتتاردى رەسەيدىڭ مادەنيەتىمەن، قۇندىلىقتارىمەن جانە زاڭدارىمەن تانىستىرۋ قاجەت. سونىمەن قاتار، ەلدە جۇرگەن شەتەلدىكتەرگە قويىلاتىن تالاپتاردى كۇشەيتۋ كەرەك،" — دەدى پۋتين.
پرەزيدەنت بۇل باعىتتاعى شارالاردىڭ ءبىرى رەتىندە ورىس ءتىلىن بىلمەيتىن بالالاردى مەكتەپكە قابىلداماۋعا مۇمكىندىك بەرەتىن زاڭدى مىسالعا كەلتىردى. ونىڭ ايتۋىنشا، بۇل ميگرانتتاردىڭ قوعامعا ءساتتى بەيىمدەلۋىنە ىقپال ەتەدى.
وسىعان بايلانىستى رەسەي مەن قازاقستان اراسىندا ءۇش وڭىردە جاڭا ورىس مەكتەپتەرىن اشۋ تۋرالى كەلىسىم جاسالعانى بەلگىلى بولدى. تۇركىستان، تاراز جانە قىزىلوردا قالالارىندا سالىناتىن بۇل مەكتەپتەردىڭ قۇرىلىسى جونىندە قازاقستاننىڭ ءبىلىم مينيسترلىگى ناقتى اقپارات ۇسىندى.
جۋرناليستەردىڭ سۇراعىنا جاۋاپ بەرگەن مينيسترلىك بۇل مەكتەپتەردىڭ قارجىلاندىرۋ كوزدەرى بويىنشا تالقىلاۋلار ءجۇرىپ جاتقانىن ايتتى. قازاقستاندا مۇنداي ءبىلىم وردالارىنىڭ اشىلۋى قوعامدا ءارتۇرلى پىكىرلەر تۋدىرۋدا، ال ساراپشىلار ولاردىڭ ۇزاق مەرزىمدى اسەرىن تالقىلاپ جاتىر.
