بۇگىن، 28 قازاندا پرەزيدەنت قاسىم-جومارت توقاەۆ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىن جاريالاپ جاتىر، دەپ حابارلايدى «ادىرنا» ءتىلشىسى.
«بۇل جولداۋدىڭ ءمانى دە، مازمۇنى دا ايرىقشا. 25 قازاندا ۇلتتىق مەرەكەمىز – رەسپۋبليكا كۇنىن اتاپ وتتىك. وسى كۇنى ەگەمەندىك تۋرالى دەكلاراتسيا قابىلداندى. ءبىز دەربەس ەل بولۋ جولىندا باتىل قادام جاسادىق. كوپ ۇزاماي تاۋەلسىزدىك تۋىن بيىككە كوتەرىپ، ەلدىگىمىزدىڭ ىرگەسىن بەكىتتىك.
مىنە، بيىل قاسيەتتى تاۋەلسىزدىگىمىزگە 35 جىل تولىپ جاتىر. بۇل تاريحي مەجەنىڭ ۇلت شەجىرەسىندە الاتىن ورنى بولەك.
بيىل ناۋرىز ايىندا حالقىمىز مەملەكەتتىگىمىزدىڭ نەگىزگى تىرەگىن – كونستيتۋتسيامىزدى قابىلدادى. بۇل تۇتاس ەلىمىز ءۇشىن تاريحي ءمان-ماعىناسى تەرەڭ وقيعا بولدى. كونستيتۋتسيانى بىرنەشە ۇرپاقتار اراسىنداعى قاستەرلى كەلىسىم دەپ اتاۋعا بولادى. ويتكەنى كونستيتۋتسيادا قازاقستاننىڭ قازىرگى ءبىتىم-بولمىسى مەن بولاشاقتاعى بەينەسى ناقتى ايقىندالدى.
جۇرتىمىز جارقىن بولاشاققا باستايتىن اۋقىمدى جۇمىستى اتقارۋعا بەلسەندى تۇردە كىرىستى. ەل ومىرىندەگى تاريحي وزگەرىستەردىڭ بارلىعى حالىقتىڭ كوز الدىندا بولىپ جاتىر. بۇل ماسەلە اسا ماڭىزدى بولسا دا، كوپ ءسوز ايتۋدىڭ قاجەتى جوق دەپ ويلايمىن»,– دەدى ول.
پرەزيدەنت ءوز سوزىندە قازاقستاننىڭ تاۋەلسىزدىگى مەن ەگەمەندىگىن قورعاۋعا قاتىستى بىرقاتار ماسەلە ءالى دە تولىق شەشىلمەگەنىن اتاپ ءوتتى.
«اشىعىن ايتساق، بۇگىندە تاۋەلسىزدىگىمىز بەن ەگەمەندىگىمىزدى قورعاۋعا قاتىستى بارلىق ماسەلە ءالى تولىقتاي شەشىمىن تاپقان جوق. بۇل – الدىمىزدا كوپتەگەن وزەكتى مىندەت تۇر دەگەن ءسوز. جۇمىستى ويداعىداي ورىنداۋ ءۇشىن، ەڭ الدىمەن، بۇكىل قوعامىمىز تاتۋ بولۋى كەرەك. بىرلىك پەن كەلىسىم بولماسا، ەشقانداي رەفورما جانە ىلگەرىلەۋ بولمايتىنى ايدان انىق»، – دەدى مەملەكەت باسشىسى.
قاسىم-جومارت توقاەۆ قازىرگى گەوساياسي احۋالدىڭ كۇردەلەنە تۇسكەنىنە نازار اۋدارىپ، جاھاندىق سىن-قاتەرلەر جاعدايىندا قوعامدا ءتارتىپ پەن جاۋاپكەرشىلىكتى كۇشەيتۋ قاجەتتىگىن جەتكىزدى.
پرەزيدەنتتىڭ ايتۋىنشا، الەم ەلدەرى اراسىنداعى ءوزارا سەنىم داعدارىسى تەرەڭدەپ، حالىقارالىق قۇقىقتىڭ بەدەلى تومەندەگەن. سونىمەن قاتار باقىلاۋسىز كوشى-قون اعىندارىنىڭ ارتۋى بىرقاتار ەۋروپالىق مەملەكەتتىڭ قاۋىپسىزدىگىنە كەرى اسەرىن تيگىزگەن.
«بىرىككەن ۇلتتار ۇيىمىنىڭ ابىروي-بەدەلى ۇلكەن توقىراۋعا ۇشىرادى. حالىقارالىق قۇقىقتىڭ قۇندىلىعى تومەندەپ كەتتى. قىسقاسى، قازىرگى الەم بۇلىڭعىر داۋىرگە اياق باستى، ونىڭ كەلەشەگى قانداي بولاتىنى تۋرالى ساياساتكەرلەر مەن ساراپشىلار اراسىندا ءبىرتۇتاس پىكىر جوق»، – دەدى پرەزيدەنت.
مەملەكەت باسشىسى الەمدەگى قازىرگى تۇراقسىزدىق پەن بەلگىسىزدىك دەڭگەيى بۇرىن-سوڭدى بولماعان سيپات العانىن اتاپ ءوتتى.
«كۇللى الەم جۇرتشىلىعى الاساپىران كەزەڭدە ءومىر ءسۇرىپ جاتىر دەسەك، ارتىق بولماس. مۇنداي كۇردەلى، بولجامسىز احۋال «قىرعي-قاباق سوعىس» كەزىندە دە بولماعان ەدى»، – دەدى قاسىم-جومارت توقاەۆ.
