شىمكەنت قالاسىنداعى «ازاماتتارعا ارنالعان ۇكىمەت» مەملەكەتتىك كورپوراتسياسى فيليالىنا قاتىستى بىرقاتار زاڭسىزدىقتار قوعامدا ۇلكەن رەزونانس تۋدىردى. بۇل جونىندە ءماجىلىس دەپۋتاتى بولاتبەك اليەۆ ۇكىمەتكە دەپۋتاتتىق ساۋال جولدادى.
دەپۋتاتتىڭ ايتۋىنشا، سوڭعى ايلاردا تىركەلگەن ءۇش ءىرى فاكتى ءبىر عانا جۇيەگە — شىمكەنتتەگى فيليالدىڭ باقىلاۋ مەن باسقارۋ تەتىكتەرىنە بارىپ تىرەلەدى.
الەۋمەتتىك تولەمدەردى ۇرلاۋ دەرەگى
جۋىردا شىمكەنتتە جالعان جۇمىسقا ورنالاستىرۋ ارقىلى جۇكتى ايەلدەردىڭ اتىنا الەۋمەتتىك تولەمدەردى زاڭسىز الۋ سحەماسى اشكەرەلەندى. تەرگەۋ دەرەكتەرى بويىنشا، ايىپتالۋشىلار بوگدە تۇلعالاردىڭ ەلەكتروندىق تسيفرلىق قولتاڭباسىن (ەتسق) پايدالانىپ، مەملەكەتتەن تولەم الىپ كەلگەن.
مەملەكەتكە كەلتىرىلگەن زالال كولەمى 217 ميلليون تەڭگەدەن اسقان. دەپۋتات بۇل جاعدايدى «ىشكى باقىلاۋ جۇيەسىنىڭ ىستەن شىعۋىنىڭ ايقىن دالەلى» دەپ باعالادى.
زاڭسىز جۇرگىزۋشى كۋالىكتەرى
بۇعان دەيىن ءدال وسى قالادا جۇرگىزۋشى كۋالىكتەرىن ەمتيحانسىز ساتۋ فاكتىسى بويىنشا ءىرى قىلمىستىق ءىس قوزعالعان. رەسمي مالىمەتكە سايكەس، 500-دەن استام ادام ەمتيحان تاپسىرماي-اق كۋالىك العان، ال «قىزمەتتىڭ» قۇنى 150–400 مىڭ تەڭگە ارالىعىندا بولعان.
ۇيىمداسقان توپتىڭ جالپى تابىسى 150 ميلليون تەڭگەدەن اسىپ تۇسكەن. دەپۋتات مۇنى دا جۇيەدەگى باقىلاۋ مەن جاۋاپكەرشىلىكتىڭ السىزدىگىنەن دەپ ەسەپتەيدى.
شەتەلدىك ازامات اتىنا راسىمدەلگەن ەتسق
تاعى ءبىر سوراقى دەرەك – شەتەلدە جۇرگەن ادامنىڭ اتىنا ەتسق راسىمدەلىپ، ول قازاقستان اۋماعىندا بەلسەندى قولدانىلعان.
اتالعان قولتاڭبامەن كومپانيالار تىركەلىپ، سالىق ەسەپتەرى، بۋحگالتەرلىك قۇجاتتار جانە سوت ىستەرى جۇرگىزىلگەن.
اليەۆتىڭ پىكىرىنشە، بۇل – مەملەكەتتىك قىزمەت كورسەتۋ جۇيەسىندەگى قاۋىپسىزدىك پەن زاڭدىلىق قاعيدالارىنىڭ ورەسكەل بۇزىلۋى.
باسقارۋ قاي دەڭگەيدە السىرەگەن؟
دەپۋتات بارلىق زاڭسىزدىقتىڭ ءبىر فيليال اۋماعىندا تىركەلۋىن باسقارۋشىلىق داعدارىس دەپ اتادى.
«ەتسق يەسىنەن تىس راسىمدەلىپ، الەۋمەتتىك تولەمدەر ۇرلانىپ، جۇرگىزۋشى كۋالىكتەرى ساتىلا باستاسا – بۇل جەكە قىزمەتكەردىڭ ەمەس، بۇكىل باسقارۋ جۇيەسىنىڭ السىزدىگى»، – دەدى ول.
ۇسىنىلعان شارالار
ءماجىلىس دەپۋتاتى ماسەلەنى شەشۋ ءۇشىن بىرقاتار ناقتى قادامداردى ۇسىندى:
1. فيليال باسشىلىعىنىڭ كاسىبي جارامدىلىعىن جانە جاۋاپكەرشىلىگىن تەكسەرۋ;
2. ەتسق راسىمدەۋ، جۇرگىزۋشى كۋالىكتەرىن بەرۋ جانە الەۋمەتتىك تولەمدەر پروتسەستەرىنە تاۋەلسىز اۋديت جۇرگىزۋ;
3. سوڭعى ءۇش جىلداعى بارلىق ەتسق، اسىرەسە شەتەل ازاماتتارىنا بەرىلگەن قولتاڭبالاردى قايتا قاراۋ;
4. ءار بۇزۋشىلىق بويىنشا جەكە قىزمەتكەرلەرمەن قاتار، باسشىلىق دەڭگەيىندە دە جاۋاپكەرشىلىك جۇكتەۋ.
بولاتبەك اليەۆ بۇل دەرەكتەردىڭ بارلىعىنا بايلانىستى ۇكىمەت باسشىلىعىنا دەپۋتاتتىق ساۋال جولداعانىن مالىمدەدى.
ول ساۋالدا شىمكەنت فيليالىندا انىقتالعان زاڭسىزدىقتار، ەتسق راسىمدەۋ كەزىندە كەتكەن بۇزۋشىلىقتار جانە الەۋمەتتىك تولەمدەر مەن جۇرگىزۋشى كۋالىكتەرىنە قاتىستى تەرگەۋ ناتيجەلەرى جان-جاقتى قارالۋى ءتيىس ەكەنىن ايتتى.
«ماقسات – كىنالىلەردى عانا ەمەس، جۇيەلىك السىزدىكتى انىقتاپ، ونى تۇبەگەيلى جويۋ»، – دەدى دەپۋتات.
ءماجىلىس وكىلىنىڭ ايتۋىنشا، «ازاماتتارعا ارنالعان ۇكىمەت» حالىق سەنىمىن قايتارعىسى كەلسە، باقىلاۋ مەن قاۋىپسىزدىك قاعيداتتارى فورمالدى ەمەس، ناقتى جۇمىس ىستەيتىن مەحانيزمگە اينالۋى ءتيىس.
ۇقساس جاڭالىقتار
