بۇگىن، 31 مامىر كۇنى الماتىداعى «قاراعايلى» ساياباعىندا 1931-1933 جىلدارداعى اشارشىلىق قۇرباندارىنا ارنالعان ەسكەرتكىشكە گۇل شوقتارىن قويۋ ءراسىمى ءوتتى. ءىس-شارا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي ۇيىمداستىرىلدى، دەپ حابارلايدى "ادىرنا".
وعان الماتى قالاسىنىڭ اكىمى دارحان ساتىبالدى، قالا باسشىلىعى، ءماسليحات دەپۋتاتتارى، قوعامدىق كەڭەس مۇشەلەرى، قوعام قايراتكەرلەرى، تاريحشىلار، قالامگەرلەر، جاستار جانە قالا تۇرعىندارى قاتىستى.
راسىمگە قاتىسۋشىلار ساياسي قۋعىن-سۇرگىن مەن اشارشىلىق قۇرباندارىن ءبىر مينۋت ۇنسىزدىكپەن ەسكە الىپ، ەسكەرتكىشكە گۇل شوقتارىن قويدى.
31 مامىر — قازاقستان تاريحىنداعى تاعىلىمى تەرەڭ كۇندەردىڭ ءبىرى. بۇل كۇنى ساياسي قۋعىن-سۇرگىن مەن اشارشىلىق ناۋبەتىنىڭ قۇربانى بولعان ميلليونداعان ادامنىڭ رۋحىنا تاعزىم ەتىلەدى. تاۋەلسىزدىك جىلدارىندا تاريحي ادىلدىكتى قالپىنا كەلتىرۋ، جازىقسىز جاپا شەككەن ازاماتتاردى اقتاۋ جانە وتكەننىڭ قاسىرەتتى كەزەڭدەرىن ۇرپاق جادىندا ساقتاۋ باعىتىندا اۋقىمدى جۇمىستار اتقارىلدى.
الماتىدا وسى ايتۋلى داتاعا وراي ءىس-شارالار كۇنى بويى جالعاسادى. سونىمەن قاتار وسى كۇندەرى شاھاردا عىلىمي كونفەرەنتسيالار، دوڭگەلەك ۇستەلدەر، تاريحي-اعارتۋشىلىق دارىستەر، كىتاپ جانە فوتوكورمەلەر، جاستاردىڭ زيالى قاۋىم وكىلدەرىمەن كەزدەسۋلەرى جانە وزگە دە تاعىلىمدىق ءىس-شارالار ۇيىمداستىرىلعان.
