تيمۋر قۇلىباەۆتىڭ Halyk قايىرىمدىلىق قورى بالالاردى قورعاۋ كۇنىنە وراي بيىل دا جىلدار بويى قالىپتاسقان ءداستۇرلى قايىرىمدىلىق باستامالارىن جالعاستىردى، - دەپ حابارلايدى "ادىرنا" ۇلتتىق پورتالى
قوردىڭ باستاماسىمەن ءبىلىم، مادەنيەت، الەۋمەتتىك قولداۋ، سپورت باعىتتارىندا جۇيەلى تۇردە جۇزەگە اسىپ كەلە جاتقان جوبالار مىڭداعان بالاعا سەنىم مەن جىلۋلىق سىيلاپ كەلەدى. اسىرەسە ەرەكشە كۇتىمدى قاجەت ەتەتىن، الەۋمەتتىك وسال توپتاعى، اۋىر دياگنوزى بار بالالاردى قولداۋ – قور قىزمەتىنىڭ اينىماس باعىتى.
قوردىڭ باس ديرەكتورى س. شۇڭكەەۆ اتاپ وتكەندەي، بالالاردى قورعاۋ كۇنى – قور جىل سايىن ارنايى دايىندالاتىن ەڭ ماڭىزدى كۇندەردىڭ ءبىرى.
«بۇل – تەك سىيلىق تاراتۋ ەمەس، بۇل – كوڭىل ءبولۋ، جان جىلۋىن سەزىندىرۋ. بالانىڭ كۇلكىسىن وياتۋ – قوعامدى ىزگىلەندىرۋدىڭ ەڭ ءتيىمدى جولى. قوردىڭ جىل سايىنعى باستامالارى وسى ۇستانىمنىڭ ناقتى ءىس ارقىلى جالعاسىپ كەلە جاتقانىن كورسەتەدى. بالالارعا كورسەتىلگەن ءاربىر نازار – ولاردىڭ بويىنا جىلۋلىق سىيلاپ قانا قويماي، قوعامنىڭ دا ىزگىلەنە تۇسۋىنە جول اشادى»، – دەيدى ول.
قوناەۆتاعى ەرەكشە بالالارعا – ەرەكشە كوڭىل
بيىل قور الماتى وبلىسى قوناەۆ قالاسىنداعى «قوناەۆ قالاسىنىڭ كۇندىزگى بولۋ ورتالىعى» كمم مەكەمەسىنە ارنايى باردى. بۇل ورتالىقتا 1,5 مەن 18 جاس ارالىعىنداعى پسيحونەۆرولوگيالىق اۋرۋلارى بار، تىرەك-قيمىل قوزعالىسى بۇزىلعان بالالار كۇندىزگى بولىمدە ارنايى الەۋمەتتىك قىزمەت الادى.
مەرەكە قارساڭىندا بالالاردىڭ كۇندەلىكتى كۇتىمىنە قاجەتتى جاعدايدى جاقسارتۋ ماقساتىندا ورتالىق بيىل Halyk قورىنا قولداۋ كورسەتۋ جونىندە حابارلاسقان. قور بۇل ءىستى نازاردان تىس قالدىرماي، كەڭەيتىلگەن اۋقىمدا الەۋمەتتىك كومەك ۇيىمداستىردى: 60 تاربيەلەنۋشىگە ارنالعان سىيلىق جيىنتىقتارىن ازىرلەپ، مەرەكەلىك ويىن-ساۋىق باعدارلاماسىن عانا ەمەس، ورتالىقتىڭ بالالارىنا ارنالعان بىرقاتار قوسىمشا الەۋمەتتىك قولداۋ شارالارىن جۇزەگە اسىردى.
بۇل - قوردىڭ قوناەۆ ورتالىعىمەن العاشقى ىنتىماقتاستىعى ەمەس: 2025 جىلى دا ءدال وسىنداي مەرەكەلىك يگىلىك كورسەتىلىپ، بالعىندارعا قۋانىش سىيلانعان بولاتىن.
قاراعاندىداعى مەكتەپ-ينتەرناتقا زامانۋي قۇرال سىيعا تارتىلدى
سونداي-اق قور Halyk Bank-پەن بىرلەسىپ قاراعاندى وبلىسى ءبىلىم باسقارماسىنا قاراستى №2 ارنايى مەكتەپ-ينتەرناتىنىڭ اكت زالىنا ارنالعان ينتەراكتيۆتى پانەل ساتىپ الۋ ءۇشىن قارجى ءبولدى.
اتالعان مەكتەپ-ينتەرناتتا ەرەكشە ءبىلىم بەرۋ قاجەتتىلىگى بار 144 بالا تاربيەلەنەدى. جاڭا ينتەراكتيۆتى پانەل ءبىلىم بەرۋ، تاربيە بەرۋ جانە تۇزەتۋ-دامىتۋ جۇمىستارىنىڭ ساپاسىن ارتتىرىپ، مەكتەپتەگى مەرەكەلىك باعدارلامالار، كونتسەرتتەر، بايقاۋلار، سەمينارلار، سىنىپ ساعاتتارى مەن اتا-انالار جينالىستارىن زاماناۋي فورماتتا وتكىزۋگە مۇمكىندىك بەرەدى.
اۋىلعا اجار بەرگەن «التىن بەسىك»
بالالاردى قورعاۋ كۇنى قارساڭىندا Halyk قورى وڭىرلەردەگى بالالارعا ارنالعان يگى باستامالارىن جالعاستىردى. سونىڭ جارقىن دالەلى – كوستاناي وبلىسى، اۋليەكول اۋدانىندا قوردىڭ قارجىسىنا بوي كوتەرگەن ەرەكشە كەلبەتتى «التىن بەسىك» بالاباقشاسى. سىرتقى كەلبەتى «حوگۆارتس» قامالىنا ۇقسايتىن بۇل عيمارات بۇگىندە تەك ساۋلەتتىك ەرەكشەلىگىمەن عانا ەمەس، اۋىلداعى مادەني، الەۋمەتتىك ءومىردى تۇبەگەيلى وزگەرتۋمەن دە تانىمال. بالا تاربيەسىنە ارنالعان كەڭ، جارقىن، زاماناۋي كەڭىستىك – قوردىڭ ەلدى مەكەندەردەگى ينفراقۇرىلىمدى جاقسارتۋعا قوسقان ماڭىزدى ۇلەسىنىڭ ءبىرى.
Halyk قورى بالاباقشانى تۇرعىزۋمەن عانا توقتاپ قالماي، جىل سايىن مۇنداعى بالدىرعاندار مەن پەداگوگتەرگە قوسىمشا قولداۋ كورسەتۋدى داستۇرگە اينالدىرعان. بيىل دا مەرەكە قارساڭىندا قور بالاباقشاعا مەكتەپكە دايارلايتىن وقۋ-ادىستەمەلىك ادەبيەتتەر، ءارتۇرلى دامىتۋشى كىتاپتار جانە فۋتبول دوپتارىن تابىس ەتتى. بۇل سىيلىقتار بالاباقشانىڭ ءبىلىم بەرۋ قورىن بايىتىپ، بالالاردىڭ جان-جاقتى دامۋىنا جاڭا مۇمكىندىك اشتى.
ايتا كەتەيىك، Halyk قايىرىمدىلىق قورى 2016 جىلدان بەرى ەلىمىزدە ءبىلىم بەرۋ، سپورت، مادەنيەت، ەكولوگيا جانە ينفراقۇرىلىم باعىتتارىندا 214-تەن استام جوبانى جۇزەگە اسىرىپ، قايىرىمدىلىق ماقساتتارعا 90,4 ملرد تەڭگەدەن استام قارجى ءبولىپ كەلەدى.
سۋرەتتەر: Halyk قايىرىمدىلىق قورىنىڭ باسپاسوزىنەن
