تۋريزم جانە سپورت ۆيتسە-ءمينيسترى سەرىك جاراسباەۆ وليمپيادا چەمپيونى ميحايل شايدوروۆتىڭ جالاقىسىنا قاتىستى تۋىنداعان جاعداي تۋرالى رەسمي مالىمدەمە جاساپ، كەلىسىمشارت ماسەلەسىنىڭ تولىق شەشىلگەنىن مالىمدەدى، دەپ حابارلايدى «ادىرنا» ءتىلشىسى.
ۆيتسە-ءمينيستردىڭ ايتۋىنشا، كەلىسىمشارت قولدانىستاعى زاڭناما تالاپتارىنا سايكەس راسىمدەلىپ، ونىڭ بارلىق تارماعى جان-جاقتى تالقىلانعان.
«ميحايل شايدوروۆ – وتاندىق سپورتتىڭ ماقتانىشى، ءوز ەسىمىن ەل سپورتىنىڭ تاريحىنا التىن ارىپتەرمەن جازعان ساڭلاق. ءبىز ونى ءاردايىم قولدايمىز جانە حالىقارالىق ارەنادا تابىستى ونەر كورسەتىپ، بيىك جەتىستىكتەرگە جەتە بەرۋىنە تىلەكتەسپىز.
قوعامدا كەڭىنەن تالقىلانىپ جاتقان كەلىسىمشارت ماسەلەسىنە توقتالسام، بۇگىنگى كۇنى كەلىسىمشارت شايدوروۆتىڭ كومانداسىنا جولداندى جانە وعان قول قويىلدى. قول قويۋ ءراسىمىنىڭ بارلىعى قولدانىستاعى زاڭناما تالاپتارىنا سايكەس ءوتتى. تاراپتار ورتاق مامىلەگە كەلىپ، كەلىسىمشارتتىڭ بارلىق تارماعىن جان-جاقتى تالقىلادى. قۇجاتقا قول قويىلعاننان كەيىن مينيسترلىك ونى جۇمىس تارتىبىمەن قابىلدادى. الداعى ۋاقىتتا كەلىسىمشارتتا كوزدەلگەن بارلىق قارجى تولىق كولەمدە تولەنەدى»،–دەدى ول.
سونداي-اق سەرىك جاراسباەۆ سپورتشىنىڭ 5 ماۋسىمدا جاڭا ماۋسىمعا دايىندىق جۇمىستارىن جالعاستىرۋ ءۇشىن اقش-قا اتتاناتىنىن جەتكىزدى.
«تاعى ءبىر ايتا كەتەتىن جايت، 5 ماۋسىمدا ميحايل شايدوروۆ جاڭا ماۋسىمعا دايىندىق ءۇشىن اقش-قا اتتانادى. سونداي-اق بىرەر كۇننەن سوڭ ميحايل شايدوروۆ ءوز كومانداسىمەن بىرگە تۋريزم جانە سپورت مينيسترلىگىنە كەلەدى. كەزدەسۋ بارىسىندا الداعى جوسپارلار مەن كەلەسى وليمپياداعا دايىندىق ماسەلەلەرىن تالقىلايمىز. سونىمەن قاتار ەلىمىزدە مانەرلەپ سىرعاناۋدى دامىتۋ باعىتىنداعى جۇمىستار جونىندە دە پىكىر الماسامىز»،– دەپ ءتۇسىندىردى ۆيتسە-مينيستر.
